Ерөнхий сайд Л.Оюун-Эрдэнэ Засгийн газрын 100 хоногт хийж хэрэгжүүлсэн ажлынхаа талаар сэтгүүлчдийн асуултад хариулж байна. 

Тэрбээр "Төв банкинд  8 их наяд төгрөг гацсан учраас бид зах зээлд 8 их наядаас их хэмжээний мөнгө оруулж байж хуучин голдиролдоо орох нөхцөл байдалтай тулгарсан. Засгийн газарт мөнгө байгаагүй учраас арилжааны банкны гацсан эх үүсвэрийг Засгийн газар яаж дэмжих вэ гэдэг бидний гол сорилт болж хувирсан. Ингээд банкны удирдлагуудтай уулзсан. ААН-үүдийн талаас банкны хүүгийн асуудлыг хөндсөн бол, банк талаасаа бидэнд вакцинжуулалтын тодорхой хугацаа хэрэгтэй гэдэг асуудлыг тавьсан. Ингээд бид 3 хувийн хүүтэй зээлийг гаргая, 2 их наяд төгрөгийн эх үүсвэр дээр 6 хувийн хүүг төсвөөс төлье гэсэн шийдвэрийг гаргасан.

Иргэн болон ААН-д 3 хувийн хүүтэй зээл олговол урамшуулалд нь Засгийн газар 6 хувийн хүүгийн дэмжлэг үзүүүлье гэсэн шийдвэр гарсан. 2 их наядын төлөвлөгөө маш амжилттай хэрэгжиж, 8373 иргэн 1526 ААН хамрагдсан. 2 их наядаар тооцвол бид 100 хоногт 34 хувийн үзүүлэлттэй гарсан. Өнгөрсөн долоо хоногийн Засгийн газрын хуралдаанаар 1 их наяд төгрөгийн эх үүсвэрийг нэмье гэсэн. Ингээд 3 хувийн хүүтэй 3 ихнаядын 3 жилийн хугацаатай хөтөлбөр болсон. Зээлийн шалгуурт Засгийн газар оролцохгүй. Арилжааны банкууд өөрийн шалгуураар олгоно.

Харин ипотекийн зээлийн хувьд Улаанбаатар хотод 2242, орон нутагт 997 зээлдэгчид 236.9 тэрбум төгрөгийн орон сууцны зээл олгосон. Эдийн засаг 2021 онд эдийн засаг өсөлттэй гарахаар үзүүлэлтүүд гарч байгаа" гэлээ.

Б.Баатар