Засгийн газрын 100 хоногийг угтаж Ерөнхий сайд Л.Оюун-Эрдэнэ 30 сэтгүүлчийн асуултад хариулж байна.

Тэрбээр өмнө нь дархлаажуулалтын явцтай танилцах үеэрээ УИХ-ын нэр бүхий гишүүд вакцины татан авалтад саад учруулсан. Эдгээр гишүүдийн нэрийг удахгүй зарлана хэмээн мэдэгдэж байсан. Тэгвэл энэ талаар “Вакцинжуулалттай холбоотой асуудлыг улстөржүүлсэн олон зүйл байсан. Тухайн үед асуудлыг хурцатгаад яах вэ гэж бодоод дуугүй л явсан.

Үүнд онцгой үүрэгтэй байсан хүн нь УИХ-ын дэд дарга С.Одонтуяа, түүний гэр бүлийн хүн Г.Өлзийбүрэн байсан.

Зарим сэтгүүлчтэй холбогдож ийм асуудлыг ярьсан. Мөн гаалийн байцаагч нар руу залгасан байсан. Төрийн өндөр албан тушаалтан  эрх мэдлээ урвуулан ашиглаж болохгүй гэдэг хатуу байр сууринаас хэлэх нь зүйтэй байх. Энэ асуудлыг хуулийн байгууллагаар шалгуулна. УИХ-ын дэд дарга хүн Гаалийн байцаагч руу утасдаад ийм бараа орж ирнэ, ирэхгүй гээд эсвэл гэр бүлийн хүн нь хуулийн байгууллагатай холбогдоод Засгийн газрын үйл ажиллагааг гуйвуулах зөвлөгөө өгөөд яваад байж таарахгүй. Хувь хүний эрх чөлөө байж болох ч харамсаж байна. Цаашид ийм асуудал гарвал ил тод хэлнэ” гэлээ.

Б.Лхам