Засгийн газрын 100 хоногийн өнөөдрийн уулзалтын үеэр Боловсрол, шинжлэх ухааны сайд Л.Энх-Амгалан мэдээлэл өглөө.
Тэрбээр "Цар тахлаас хамгийн их хохирол амсаж байгаа нь боловсролын салбар юм. Дэлхийн банктай хамтарч судалгаа хийхэд цар тахал цаашид үргэлжилж хэрэв ирэх намар хичээл танхимаар эхлэхгүй бол цаашдаа 3-5 жилийн хугацаанд Монголын эдийн засагт ирэх шууд ба шууд бас нөлөө хоёр тэрбум орчим ам.доллар (5,6 их наяд төгрөг) буюу улсын төсвийн тал хувьтай тэнцэх хохирол гарахаар байгаа юм.
Энэ бол зөвхөн манайд гарч буй үзэгдэл бус дэлхийн ихэнх оронд тулгарч байгаа юм. Манайд нэг хичээлийн жилд 165-180 хоног байдаг бол 2020 онд 40 орчим хувийг цахимаар, 60 хувьд нь танхимаар хичээллэсэн. Харин 2021 онд дээрх 165 гаруй хоногийн дийлэнх буюу 110 хоногт цахимаар буюу теле хэлбэрээр хичээллэлээ.
Ковид гарахаас өмнө боловсролын салбарт хоцрогдол аль хэдийнэ үүссэн байсан. Тиймээс Ковидын өмнөх болон дараа үүссэн хоцрогдлыг арилгах реформыг цаг алдалгүй хийх шаардлагатай болсон. Өөрөөр хэлбэл, ирэх намар л гүйцчих хоцрогдол биш юм. Тиймээс боловсролын салбарт 2021-2023 онд хийх цогц төлөвлөгөөг гаргасан ба удахгүй Засгийн газрын хуралдаанд танилцуулна. Үүнд, нэлээдгүй хэмжээний зардал, санхүүжилт гарах төлөвтэй байна" гэлээ.
