Ерөнхий сайд Л.Оюун-Эрдэнэ болон танхимын гишүүд нь сэтгүүлчдийн асуултад хариулт өгч байна.

"С.Зоригийн хэргийн захиалагчийг зарлана гэж хэчнээн жил, сонгууль болгоноор шоу хийв. Энэ хэргийн захиалагчийг хэзээ зарлах вэ" гэх сэтгүүлчийн асуултад Засгийн газрын Хэрэг эрхлэх газрын дарга Ц.Нямдорж хариулт өглөө.

Тэрбээр "Би 2016 оны гуравдугаар сараас хойш хэлмэгдсэн иргэдийн асуудлаар хөөцөлдөж байгаа хүн. Ямар нэгэн баян тарган, эрх мэдэлтэй хүмүүсийн хойноос бус, хэлмэгдсэн гэдгийг нь маш сайн мэдэж байгаа учраас би хөөцөлдөөд байгаа юм. Монголд шударга ёс гэж байдаг юм уу, үгүй юу, хууль ёс гэж байдаг юм уу, үгүй юу гэдгийг үзэх гэж зургаан жилийн нүүрийг үзэж байна. Миний хэлсэн үгийг мушгиад байгаа юм. Би яг юу хэлсэн юм бэ гэхээр "Захиалагч гэх хүмүүсээ зарлахыг хууль хяналтын байгууллага, цагдаагаас шаардана" гэж л хэлсэн. Тэднийг захиалгаар хүн алсан гэж шийтгэчихээр нь.

2017 оны арваннэгдүгээр сард ажлаа авсан өдрийнхөө орой нь цагдаагийнхныг цуглуулаад "Та нар ажлын хэсгийн бүрэлдэхүүнд орсон. Энэ хоёр хүнийг захиалгаар хүн алсан гэж шийтгэж байгаа юм бол захиалагчаа  зарла" гэдгийг хэлсэн. Гэвч хэн ч зарлаж чадаагүй.

Би захиалагч гэдэг үгийг хэрэглэхдээ "гэх" гэдэг үгийг заавал хэлдэг. Яагаад гэвэл тэр үедээ хэргийг шалгаж, мөрдсөн, шүүсэн, хянасан бүх хүн захиалагчийг нь тогтоож чадаагүй мөртлөө захиалгаар хүн алсан гээд Б.Содномдаржаа Т.Чимгээ хоёрт ял оноочихсон. 

Би сая "Өдрийн сонин"-д "Хонгил үүссэн түүх ба яргын хэрэг" гэдэг өгүүлэл нийтлүүлсэн. Энэ дотор бүх үнэнийг бичсэн. Энэ хэрэгт Ц.Амгаланбаатарын мэдүүлгээр захиалагчаар Э.Бат-Үүлийг татсан. Хамжигчаар нь Б.Булганыг татаж, 10 сар хорьсон. Тогтоож чадаагүй тавьсан. Хамтрагчаар нь А.Ганхуяг гэдэг хүнийг татсан. Мөн л тогтоож чадаагүй. Найман сар хориод сулласан. 

2016 оны есдүгээр сарын 2-нд Э.Бат-Үүлийг С.Зоригийн амь насанд халдсан гэж яллагдагчаар "нотлогдож байгаа" гэдэг үгтэйгээр татчихаад 20 хоногийн дараа "нотлогдоогүй" гээд яллагдагчаар татсан тогтоолыг хүчингүй болгож байсан.

Ц.Амгаланбаатар гэдэг хүн 2014 оноос хойш л Э.Бат-Үүлийн талаар ярьж эхэлсэн. Ийм юм байгаа учраас би хүн хэлмэгдүүлсэн гэж тууштай тэмцэж байгаа юм. Үүнд ямар ч эргэлзээ байхгүй. 

Ядаж л  Ц.Амгаланбаатар нь элдэв юм яриад байгаа бол Э.Бат-Үүлийг байцаах ёстой биз дээ. Гэтэл байцаагаагүй. Зөндөө юм байгаа. Э.Бат-Үүлийн талаар Ц.Амгаланбаатарын ярьсан бүх зүйлийг би тэр сонин дээр бичсэн. Болсон бүх зүйлийн талаар би нэг бүрчлэн юуг ч нуулгүйгээр бичсэн. Тэнд байгаа үг болгон үнэн учраас хариу юу ч хэлж чадахгүй байгаа байхгүй юу. Одоо шүүхийнхэн энэ асуудлыг яаж эцэслэн шийдэх юм. Би мэдэхгүй байна. Эргэлзээ байсан бол би ийм итгэлтэй үг хэлж чадахгүй.

2016 оны есдүгээр сард Э.Бат-Үүл Хотын дарга байхдаа "Намайг яллагдагчаар татчихлаа" гэж ярилцлага өгч байсан. Энэ үнэн шүү. 

Одоо баасан гарагт энэ хэрэгт холбогдолтой Дээд шүүхийн хурал болно. Шүүх яаж шийдэхийг харъя. Яргалсан гэдэг нь ойлгомжтой болсон. Үүнд бас нэгэн сонин зүйл байгаа. Ц.Амгаланбаатар гэдэг хүний эмээ н.Цэвэлмаа гэдэг хүн байж байгаад нас барсан. Энэ хүн, Чимгээгийн нөхөр Бямбасүрэнгийн төрсөн ээж нь. Мөн хоригдож байсан А.Ганхуягийн ээж энэ гурав төрсөн эгч дүүс. 

Ц.Амгаланбаатарын худал ярьсан зүйлийг хэрэг болгон босгох гэж хүчээр юм хийгээд сүүлд нь юм болгож чадахгүй нурсан л асуудал шүү дээ. Төрсөн эгч, дүү гурвын амьдралыг тэр чигт нь хамсан. Дорноговьд нэг нь байж байна. Нэг нь бурхан болж, нөгөө нь Эрдэнэтэд байж байна. Үнэхээр аймшигтай. Бүр анх асуудлыг ярьж эхэлж байхад л тэр мессежүүд дотор чинь үүнийг бичээд эхэлсэн. Ийм л учиртай юм" гэлээ. 

Б.Баатар