Монголын Ардчилсан хөдөлгөөний удирдагч, төр, нийгмийн нэрт зүтгэлтэн, Дэд бүтцийн сайд асан С.Зориг агсан амь насаа алдаад хэдийнэ 23 жилийн нүүр үзжээ. Гэсэн ч өнөөдрийг хүртэл захиалагч хийгээд жинхэнэ алуурчид нь ил болоогүй байгаа гэх. Улс төрийн сонгууль бүрийн өмнө сөхөгдөж, шоу болдог эл хэргийн үнэн мөнийг олж илрүүлэхийг ард түмэн туйлаас их хүсэж буй.
С.Зориг агсны амь насыг бүрэлгэсэн хэргээр Т.Чимгээ, Б.Содномдаржаа нар бүх шатны шүүхээс ял сонссон. Тэднийг Ц.Амгаланбаатарын мэдүүлгээр хилс хэрэгт гүтгэж, хэлмэгдсэн гэдгийг хохирогчийн ар гэр болон албаны олон хүн хэлдэг.
Энэ жил С.Зориг агсны төрсөн өдрөөр буюу дөрөвдүгээр сарын 20-ны өдрөөр талийгаачийн ар гэрийнхэн болох төрсөн ах С.Баяр, дүү С.Оюун нар мэдэгдэл гаргасан билээ. Тус мэдэгдэлд, С.Зоригийн амь насыг онц эрцгийгээр хөнөөсөн хэргийн материалыг бүхэлд нь төрийн нууцаас гаргаж нээлттэй болгохоор шийдвэрлэсэн нь зөв зүйтэй алхам боллоо. Шүүхийн шийдвэр үндэслэлтэй гарсан гэдэгт ч ихээхэн эргэлзэж байгаагаа бид тухайн үед мэдэгдэж байсан билээ.
Одоог болтол хэргийг шийдвэрлээгүй, үнэн мөнийг тогтоогоогүй байгаа гэж талийгаачийн ар гэр бидний зүгээс үзэж байна.
Хэргийг илрүүлээгүйгээр барахгүй гэм зэмгүй хүмүүсийг хилсээр шийтгэсэнд бид маш их харамсдаг, цаашид ч гэсэн энэ хэргийн улмаас хэн нэгэн хэлмэгдэх ёсгүй гэсэн хатуу байр суурьтай байдаг юм" хэмээсэн байв.
Тэгвэл ХЗДХ-ийн сайд асан, ЗГХЭГ-ын дарга Ц.Нямдорж ч мөн С.Зоригийн хэрэгт буруутгагдан ял эдлэж буй Т.Чимгээ, Б.Содномдаржаа нарыг хэлмэгдсэн болохыг өчигдөр дахин мэдэгдэв.
Тэрбээр, "Би 2016 оны гуравдугаар сараас хойш хэлмэгдсэн иргэдийн асуудлаар хөөцөлдөж байгаа хүн. Ямар нэгэн баян тарган, эрх мэдэлтэй хүмүүсийн хойноос бус, хэлмэгдсэн гэдгийг нь маш сайн мэдэж байгаа учраас би хөөцөлдөөд байгаа юм.
Одоо баасан гарагт энэ хэрэгт холбогдолтой Дээд шүүхийн хурал болно. Шүүх яаж шийдэхийг харъя. Яргалсан гэдэг нь ойлгомжтой болсон" гэдгийг онцолсон.
Ц.Амгаланбаатарын мэдүүлгээр С.Зоригийн хэрэгт Э.Бат-Үүлийг захиалагчаар, хамжигчаар Б.Булганыг татсан
ЗГХЭГ-ын дарга Ц.Нямдорж мөн Ц.Амгаланбаатарын мэдүүлгээр С.Зоригийн хэрэгт Э.Бат-Үүлийг захиалагчаар, хамжигчаар Б.Булганыг татсан болохыг тодотгов.
Тэрбээр "Энэ хэрэгт Ц.Амгаланбаатарын мэдүүлгээр захиалагчаар Э.Бат-Үүлийг татсан. Хамжигчаар нь Б.Булганыг татаж, 10 сар хорьсон. Тогтоож чадаагүй тавьсан. Хамтрагчаар нь А.Ганхуяг гэдэг хүнийг татсан. Мөн л тогтоож чадаагүй. Найман сар хориод сулласан.
2016 оны есдүгээр сарын 2-нд Э.Бат-Үүлийг С.Зоригийн амь насанд халдсан гэж яллагдагчаар "нотлогдож байгаа" гэдэг үгтэйгээр татчихаад 20 хоногийн дараа "нотлогдоогүй" гээд яллагдагчаар татсан тогтоолыг хүчингүй болгож байсан.
Ц.Амгаланбаатар гэдэг хүн 2014 оноос хойш л Э.Бат-Үүлийн талаар ярьж эхэлсэн. Ийм юм байгаа учраас би хүн хэлмэгдүүлсэн гэж тууштай тэмцэж байгаа юм. Үүнд ямар ч эргэлзээ байхгүй.
Ядаж л Ц.Амгаланбаатар нь элдэв юм яриад байгаа бол Э.Бат-Үүлийг байцаах ёстой биз дээ. Гэтэл байцаагаагүй. Зөндөө юм байгаа. Э.Бат-Үүлийн талаар Ц.Амгаланбаатарын ярьсан бүх зүйлийг би тэр сонин дээр бичсэн. Болсон бүх зүйлийн талаар би нэг бүрчлэн юуг ч нуулгүйгээр бичсэн. Тэнд байгаа үг болгон үнэн учраас хариу юу ч хэлж чадахгүй байгаа байхгүй юу. Одоо шүүхийнхэн энэ асуудлыг яаж эцэслэн шийдэх юм. Би мэдэхгүй байна. Эргэлзээ байсан бол би ийм итгэлтэй үг хэлж чадахгүй.
2016 оны есдүгээр сард Э.Бат-Үүл Хотын дарга байхдаа "Намайг яллагдагчаар татчихлаа" гэж ярилцлага өгч байсан. Энэ үнэн шүү" гэв.
Б.Баатар
Сэтгэгдэл (1)