Монгол Улсын Ерөнхий сайд Л.Оюун-Эрдэнэ вакцины татан авалтад санаатайгаар саад учруулж, эх орныхоо эсрэг үйлдэл гаргасан зарим нэгэн улстөрчийг зарлана. Цаашлаад хариуцлагын асуудлыг ярина хэмээсэн. Энэ цагаас  хойш хэн юм бол гэх асуулт хариулт нэхсээр байсан юм. Харин Ерөнхий сайд Засгийн газрынхаа 100 хоногийн ажлаа тайлагнах үеэр энэ асуултад хариуллаа.

Тэрбээр “УИХ-ын дэд дарга С.Одонтуяа болон түүний гэр бүлийн хүн Г.Өлзийбүрэн нар сэтгүүлчтэй холбогдож, ийм асуудлыг ярьсан. Мөн гаалийн байцаагч руу залгасан байсан.Төрийн өндөр албан тушаалтан эрх мэдлээ урвуулан ашиглаж болохгүй гэх хатуу байр сууринаас хэлэх нь зүйтэй байх. Энэ асуудлыг хуулийн байгууллагаар шалгуулна.

УИХ-ын дэд дарга хүн гаалийн байцаагч руу утасдаад ийм бараа орж ирнэ, ирэхгүй гээд эсвэл гэр бүлийн хүн нь хуулийн байгууллагатай холбогдоод Засгийн газрын үйл ажиллагааг гуйвуулах зөвлөгөө өгөөд яваад байж таарахгүй” гэсэн билээ. Харин С.Одонтуяа гишүүн энэхүү мэдээллийн дараахан мэдэгдэл хийн, сөрөг хүчний хувьд харлуулах гэж намайг гүтгэж байна хэмээсэн.

Монгол Улсын Ерөнхий сайд ор үндэсгүй зүйлийг олон нийтэд дэлгэнэ гэж байхгүй. Баахан сэтгүүлч өмнөө суулгачихаад  зохиож ярина гэж бүр байхгүй санагдана. Төрийн өндөр дээд албан тушаал хашиж байгаа хүний хувьд хэлэх үг, хийх үйлдлээ сайтар мэдэж байх учиртай.

Харин С.Одонтуяа гишүүн вакцинжуулалтын төсвийг төсөвтөө суулга гэж шахаж шаардаж, зарим нэг талаар шүүмжилснийх нь төлөө өөрийг нь гүтгэлээ хэмээж байгаа. Мөн хууль, шүүхийн байгууллагад хандахаа мэдэгдсэн.   Хоёр үнэн гэж байдаггүйтэй адил энэ асуудлыг хууль хяналтын байгууллага нь шалгаад үнэн мөнийг тогтоох биз.

Үнэхээр л вакцины татан авалтад санаатайгаар саад учруулсан бол С.Одонтуяаг гишүүнээс нь эгүүлэн татах ч багадана. Учир нь, нийтээрээ, нийгмээрээ цар тахлын эсрэг тэмцэж байхад ёстой л эх орныхоо эсрэг зогссон ноцтой хэрэг болно.

У.Тэргэл