УИХ-ын чуулганы өнөөдрийн хуралдаанаар "Гэмт хэрэг зөрчлөөс урьдчилан сэргийлэх тухай хуульд нэмэлт өөрчлөлт оруулах тухай хууль" болон хамт өргөн мэдүүлсэн Барилгын тухай хуульд өөрчлөлт оруулах тухай хуулийн төслийг хэлэлцэж байна. Хуулийн төслийг ХЗДХ-ийн сайд Х.Нямбаатар танилцуулж, хэлэлцэж буй асуудалтай холбогдуулан гишүүд асуулт асууж байгаа юм.

Энэ үеэр УИХ-ын гишүүн Д.Тогтохсүрэн: Энэ хууль хоёр талтай л даа. Нэг талаас камержуулалтаа сайжруулаад хэрэг зөрчлөөс сэргийлэхээр төлөвлөж байна. Гэхдээ нөгөө талаас хүний эрхийн асуудал яригдана. Теле камержуулалт нэлээд хэмжээний хөрөнгө шаардана. Хэдий хэмжээний хөрөнгө төсөвлөж байгаа вэ. Мөн аюулгүй байдлын талаар ямар арга хэмжээ авч ажиллах вэ.

Хууль зүй, дотоод хэргийн сайд Х.Нямбаатар: Цагдаагийн байгууллагаас гаргасан судалгаагаар, өнөөдөр манайд улсын хэмжээнд 6686 камер суурилуулсан ч 4216 нь ажиллаж байгаагаас 1251 нь дүрсний шаардлага хангахгүй, 2470 нь огт ажиллахгүй байна.

Цагдаагийн байгууллагаас олон судалгаа хийсэн. Улсын хэмжээнд хилийн боомт болон хот суурин газар 60 гаруй мянган камер суурилуулбал хяналтын систем рүү шилжиж чадна гэсэн дүгнэлтэд хүрсэн. 300 гаруй сая ам.долларын асуудлыг ярьж байгаа. Хүү, торгуулийн орлогоос жил болгон камержуулалтын асуудлыг шийдэж явахаар тусгасан. Камерын ашиглалт болон арчлалтыг орон нутаг хариуцахаар тусгасан. Улсын төсөвт дарамт учруулах боломжгүй. Иймээс торгуулийн орлогын 20 хувийг шинээр камер суурилалт болон ашиглалтад зарцуулахаар тооцоолсон. Теле камержуулалт нэмэгдсэнээр гэмт хэргийн гаралт багасна. 

УИХ-ын гишүүн Д.Ганбат: Камержуулалтаас гадна чухал асуудал олон бий. Гэр хороололд байгаа хүмүүсийн амьдрал хэцүү байна. Камержуулалтад ийм их хэмжээний хөрөнгө мөнгө зарцуулах шаардлага байна уу. 

Хууль зүй, дотоод хэргийн сайд Х.Нямбаатар: Нэг дор хэдэн зуун сая төгрөг зарлагдах талаар бид яриагүй. Торгуулийн орлогын 40 хувийг гэмт хэргээс урьдчилан сэргийлэхэд зарцуулах талаар хуульд тусгасан. Цагдаагийн байгууллага энгэрийн камерыг сүүлийн 11 жил ашиглаж байна.

У.Тэргэл