УИХ-ын гишүүн асан С.Эрдэнийн нэхэмжлэлтэй Захиргааны хэргийн Давж заалдах шатны шүүх хурал өчигдөр болж, анхан шатны шүүхийн шийдвэрийг хүчингүйд тооцох, хэргийг буцаах шийдвэр гаргасан. Тодруулбал, Захиргааны хэргийн анхан шатны шүүхээс Ардчилсан намын хяналтын дугаарыг шинээр олгосон улсын бүртгэлийн байгууллагын шийдвэрийг анхан шатны шүүхээс хүчингүй болгох буюу С.Эрдэнийн тамга хүчингүй гэж үзсэн юм. Харин Давж заалдах шатны шүүхээс анхан шатны шүүх уг хэргийг хянан шийдвэрлэхдээ ноцтой алдаа гаргасан гэж үзсэн юм. Өөрөөр хэлбэл, М.Тулгатынх уу эсвэл О.Цогтгэрэлийн тамга хүчинтэй эсэхэд шүүх цэг тавьж чадаагүйгээс гадна С.Эрдэнэ, Н.Алтанхуягийн алийг ч хууль ёсны нэр дэвшигч гэж хэлэх боломжгүй болж байна. Үүнтэй холбогдуулан тамганы маргаан цааш ч үргэлжлэхээр боллоо. Шүүхийн шийдвэр гараагүй, алиных нь тамга хүчин төгөлдөр гэдгийг шүүх шийдэж чадаагүй учраас АН нэр дэвшигчгүй үлдэх магадлал өндөр байна.

Шүүхийн шийдвэртэй холбоотой талуудын байр суурийг хүргэж байна.

М.Тулгатыг дэмжигч АН-ын генсек Ч.Өнөрбаяр “2020 оны УИХ-ын сонгуулиар бие дааж нэр дэвшсэн хүн аль нэг намд элсэхийг хориглосон. Бүлгээсээ гарахыг нь мөн адил хаасан. Тиймээс хууль зүйн хувьд АН 11 гишүүнтэй хэвээр байгаа.

Бид М.Тулгатыг намын даргаар бүртгүүлэхээр үндэслэлүүдээ хүргүүлсэн. Өмнө нь хоёр хүн бүртгүүлэхээр материал хүргүүлсэн байсныг Улсын Дээд шүүх буцаасан. Одоо зөвхөн манайхаас очсон материал байгаа. Тамганы асуудал шүүхээр эцэслэгдээд шийдвэрлэгдлээ. Тиймээс М.Тулгат даргыг бүртгүүлэхэд ямар нэгэн асуудал байхгүй” гэсэн бол О.Цогтгэрэлийн талын хуульч Д.Буянжаргал “Урьдчилсан хэлэлцүүлгээр тамганы актын биелэлтийг түдгэлзүүлсэн байсныг хүчингүй болголоо. С.Эрдэнэ гэдэг хүн өнөөдрийг хүртэл хүчингүй тамгаар үйл ажиллагаа явуулж байсныг харуулж байна. Үүнээс хойш хэрэг хянан шийдвэрлэх ажиллагаа түдгэлзсэн байсан нь сэргээгдэж байна. Дээрх хурлаар эцсийн шийдвэр гарлаа гэсэн үг биш юм. 

Өмнө нь урьдчилсан хэлэлцүүлгийн захирамж гарсан байсан. Анхан шатны шүүхийн хэрэг хянан шийдвэрлэх ажиллагааг одоо явагдана” гэсэн юм.

Ямартай ч анхан шатны шүүхийн шийдвэр буцчихсан. Шүүхийн шийдвэр аль нэг талд нь эцэслэгдээгүй цагт тэдний маргаан дуусахгүй нь тодорхой болсон. Улмаар ээлжит Ерөнхийлөгчийн сонгууль АН-аас холуур өнгөрч магадгүй шинжтэй болж байна.

А.Сүх