Засгийн газрын өнөөдрийн өргөтгөсөн хуралдаанаар Улаанбаатар хотын түгжрэлийг бууруулах, орон сууцжуулах хөтөлбөр, дулаан, эрчим хүч, усан хангамж, цэвэрлэх байгууламж, дагуул хот, “Богдхан төмөр зам”, Нийслэлийн эрх зүйн байдлын тухай хуулийн шинэчилсэн найруулгын төсөл зэрэг чухал олон асуудлыг хэлэлцэн, шийдвэрлэх арга замыг ярилцсан байна.

Хуралдааны үеэр Ерөнхий сайд Л.Оюун-Эрдэнэ "Төрийн байгууллагууд үе шаттайгаар хотын төвөөс гарч манлайлал үзүүлэх хэрэгтэй. Хотын захиргаа Яармаг руу нүүнэ. Энэ асуудлыг наадмын дараа шийднэ. Хот төлөвлөлтийг хариуцан ажиллаж байгаа гэдэг утгаараа Барилга, хот байгуулалтын сайд үүнд манлайлал үзүүлэн, хариуцан ажиллахаа хэлсэн” гэв.

Улаанбаатар хотыг 2020 он хүртэл хөгжүүлэх ерөнхий төлөвлөгөөний дагуу хотын нутаг дэвсгэрийг хот төлөвлөлтийн найман бүсэд хувааж, нэг төвт хотоос олон төвт хот болгон хөгжүүлэхээр болсон. Энэ хүрээнд нийслэлийн төр, захиргааны байгууллага буюу Хотын захиргааг 2019 оны эхээр Хан-Уул дүүргийн IV хорооны нутаг дэвсгэр Яармаг руу нүүлгэн шилжүүлэхээр болж, “Нийслэлийн нутгийн захиргааны байгууллагуудыг шилжүүлэн байршуулах зарим арга хэмжээний тухай” 37 дугаар тогтоол гарсан юм.

Нийт 58262 м2 талбай бүхий гурван блок барилгын А блок 10 давхар, Б блок 13 давхар, В блок гурван давхар байх бөгөөд нийтдээ 97 тэрбумын хөрөнгөөр сүндэрлэсэн уг барилгад өнөөдрийг хүртэл Хотын захиргааныхан нүүж оролгүй, нүүнэ, нүүхгүй гэсэн маргаан ид яваа юм.

Харин Ерөнхий сайд энэхүү талцалд цэг тавьж, Улсын их баяр наадмын дараа Хотын захиргааг нүүлгэж, Яармаг дахь шинэ байранд нь оруулахаар болж байна.  

Ийн талцаж байх зуурт тус барилгын А блокийг Ерөнхийлөгчийн охин Б.Намуун эзэгнэсэн байдаг. Тэрбээр нөхөр О.Тэнүүний хамт “Залуу бизнес эрхлэгчдийн зөвлөл” ТББ байгуулсан ба уг төв нь Хотын захиргааны шинэ байранд үйл ажиллагаагаа эхлүүлж, хэдийнэ төвхнөсөн. Татвар төлөгчдийн мөнгөөр боссон тус барилгад Ерөнхийлөгчийн охины ТББ үйл ажиллагаа явуулж буйд олон хүн шүүмжлэлтэй хандсан. Гэвч удахгүй эзэд нь нүүн очихоор болж байна. 

У.Тэргэл