АН-аас сонгуулийн хар машинаар санал луйвардсан асуудлаар мэдээлэл хийлээ.

Компьютер, графикч мэргэжилтэй н.Ган-Очир “Миний бие Монгол Улсын төрийн эрх мэдлийг хууль бусаар авсан гэмт хэргийн гэрч, хохирогч болсон бөгөөд сонгуулийн хар машиныг хакердах замаар иргэдийн саналыг луйвардсан бодит баримттай хэрэг юм. Энэ хэрэгт миний бие болон Монгол Улсын Ерөнхийлөгчийн зөвлөх, МАН-ын нэр бүхий удирдах албан тушаалтнуудын хамт цагдаа, тагнуулын байгууллагаар зургаан сар шалгуулсан.

Гэвч хохирогч байхгүй үндэслэлээр прокурорын байгууллагаас хэргийг хаасанд иргэн хүний хувьд гомдолтой байна.

Учир нь энэ хэрэг нь орон нутгийн сонгуулиар үйлдэгдсэн ч өнгөрсөн оны УИХ-ын ээлжит сонгуулиас улбаатай гэдэг нь хөдөлшгүй баримтаар нотлогдож байгаа юм. Намын болон төрийн өндөр албан тушаалтнууд иргэдийн саналыг хар машинаар өөрчлөх зорилгоор үгсэн хуйвалдаж 175 тэрбум төгрөг яригдсаныг өөрийн нүдээр харж, чихээр сонссон юм. Энэ талаар хууль хяналтын байгууллагад шалгуулахаар өгсөн ч эцэст нь эсрэгээрээ миний биеийг хэлмэгдүүлж, удаан хугацааны дарамт үзүүлж, нэр бүхий хүмүүст ял завших боломж олгосныг хүлээн зөвшөөрч чадахгүй. Миний гаргах баримтаар дээрх хэргүүд тодорхой болно” гэлээ.

Б.Лхам