Сонгуулийн ерөнхий хорооноос Ерөнхийлөгчийн 2021 оны ээлжит сонгуульд нэр дэвшигчдийн үнэмлэхийг хэвлээд эхэлсэн. Сонгуулийн сурталчилгааны албан ёсны өдөр нэр дэвшигчдийн үнэмлэхийг гардуулах юм.

Тэгвэл сонгууийн сурталчилгээтай холбогдуулан С.Эрдэнийг дэмжигч талын дарга М.Тулгат бусад намуудад зардал мөнгөө хэмнэж, сурталчилгаагаа хамт хийх уриалга гаргасан юм. Тэрбээр “Цар тахалтай хүнд нөхцөл байдалд сонгууль болох учраас мөнгө цацсан үрэлгэн сонгууль болгохгүй байя. Цар тахалтайн дээр хугацаа богино учраас бүх аймгаар явж чадахгүй. Тиймээс нэр дэвшигчид орон нутгуудад уулзалтуудаа хамтарсан байдлаар хийх, хэвлэл мэдээллийн хэрэгслээр бодлогын мэтгэлцээнийг таван удаа явуулж, ард түмэнд хүртээмжтэй байдлаар мэдээллийг өгөх урилгыг хүргүүлсэн” талаараа мэдээлсэн.

Монгол Улсын Ерөнхийлөгчийн 2021 оны ээлжит сонгуульд нам, эвслээс зарцуулах зардлын дээд хэмжээг найман тэрбум 103.9 сая төгрөг, сонгуулийн нийт зардлыг 26 тэрбумаар тогтоосон. Дэлхий нийтэд цар тахал дэгдэж эдийн засгийн хүнд нөхцөл байдалд орж, бүсээ чангалж байгаа энэ үед бид аль болох чадах чинээгээрээ үрэлгэн зангаа гээж, бага зардлаар зохион явуулах санаачилга гаргасныг дэмжие. Цахим сүлжээ хөгжсөн мэдээллийн эрин зуунд хэвлэмэл материал уншихаас илүүтэй цаг бага зарах, ойлгомжтой, товч мэдээллийг иргэд цахимаар түлхүү авдаг болсон. Тиймээс сонгуулийн сурталчилгаагаа аль болох бага зардлаар хийж төсвийн сахилга байх, илүү гарсан мөнгийг ирээдүйдээ хөрөнгө оруулахад зарцуулж, ухамсартай хандахыг улс төрийн намуудад уриалж байна.

А.Сүх