УИХ-ын чуулганы өнөөдрийн хуралдааны үеэр, гавьяаныхаа амралтад гарч байгаа УИХ-ын Тамгын газрын Тэргүүн дэд дарга Н.Цогтсайханд УИХ-ын дарга Г.Занданшатар хүндэтгэл илэрхийлж, үг хэллээ.

Тэрбээр, "УИХ-ын Тамгын газрын Тэргүүн дэд дарга Насангийн Цогтсайхан насаараа хуульчаар ажилласан. Тэрбээр өнөөдрийн нэгдсэн чуулганы хуралдаанд оролцоод, үүрэгт ажлаасаа чөлөөлөгдөж гавьяаны амралтад гарч байна. Н.Цогтсайхан нь хуульчийн мэргэжил эзэмшин, ажил амьдралын гараагаа эхлээд хуульчаар ажилласан, Байнгын ажиллагаатай парламентын 30 жилийн түүхийн 28 жилд нь УИХ-д тасралтгүй хуульчаар ажилласан хүн. Өөрөөр хэлбэл, Монгол Улсын  Байнгын ажиллагаатай парламентын түүхийн амьд гэрч болсон эрхэм. Тамгын газарт хуульчийн туслахаас эхлээд шатлан дэвших мэрит зарчмаар, алгасалгүй дэвшин ажилласан монгол төр, УИХ-ын шалгарсан албан хаагч, хуульч юм. УИХ-д өргөн мэдүүлсэн төсөл, УИХ-аас батлан гаргасан хууль тогтоомж бүрийг нягтлан уншиж, хянаж байдаг нарийн чимхлүүр, нүсэр, хүнд хүчир ажилд насаараа зүтгэсэн Н.Цогтсайхан танд УИХ-ын гишүүдийнхээ нэрийн өмнөөс эрүүл энхийг хүсэж, амьдралд нь хамгийн сайн сайхныг хүсэн ерөөе” хэмээв.

Р.Алтан