Монгол Улсын Ерөнхийлөгчийн сонгуульд нэр дэвшигчдийн албан ёсны сурталчилгаа ирэх даваа гараг буюу тавдугаар сарын 24-нөөс  эхэлнэ.  Сурталчилгааны хоног 15  бөгөөд сонгогчид одооноос л У.Хүрэлсүх, С.Эрдэнэ, Д.Энхбат нарын хэнийг сонгохоо дотроо товлон, мөрийн хөтөлбөрийг нь хүлээж суугаа. Энэ удаагийн Монгол Улсын Ерөнхийлөгч зургаан жилээр сонгогдох онцлогтой.

У.Хүрэлсүх ялагдах эрхгүй. Тиймээс бүхнээрээ дэнчин тавина гэсэн үг

Гишүүдийнхээ 100 хувийн саналаар ямар ч өрсөлдөгчгүйгээр Монгол Улсын Ерөнхийлөгчийн сонгуульд намаасаа нэр дэвшсэн эрхэм бол МАН-ын дарга У.Хүрэлсүх юм.  Шударга, зангарагтай гэгддэг түүний цар тахлын энэ үед гаргасан шийдвэрүүдийг нь нийгэм талархан хүлээн авч харин Ерөнхий сайдын албаа өгсөнд нь дурамжхан байдаг. Гэвч У.Хүрэлсүх надад хоёрхон сонголт байсан. Нэг нь улс эх орноо самралцах, эс бөгөөс  галыг өөр дээрээ авах хэмээсэн. Харин түүний сонголт галыг өөр дээрээ авах байсан гэдгээ хожим учирлаж, тайлбарласан билээ. Энэ нь нөгөө талаар алс холыг харсан шийдвэр байсан нь өдгөө улам бүр тодорхой болж буй юм. Тодотговол, нэг сумаар хоёр туулай буудлаа гэсэн үг.  

У.Хүрэлсүхийн хувьд энэ удаагийн Монгол Улсын Ерөнхийлөгчийн сонгууль томоохон сорилт, сонголтыг түүнд авчирна. Учир нь, тэрбээр ялагдах эрхгүй гэсэн үг. Ялагдвал юуны Ерөнхийлөгч, намын дарга ч үгүй, нэр хүнд ч үгүй, албан тушаал ч үгүй сул гишүүн үлдэнэ. Тиймээс тэрбээр энэ удаад бүхий л зүйлээрээ дэнчин тавихаас өөр аргагүй юм.

С.Эрдэнэ Монгол Улсын Ерөнхийлөгчийн сонгуульд өрсөлдсөн гэдэг бахархам түүхийг намтартаа бичнэ

С.Эрдэнэ АН-ынхаа тамга, тэмдгийн хэрүүл хийж явснаас бус Монгол Улсын Ерөнхийлөгчийн сонгуульд өрсөлдөх хэмжээний амбийц, эр зориг түүнд өмнө байгаагүй. Харин АН-аас Ерөнхийлөгчийн сонгуульд нэр дэвшин өрсөлдөхөөр  нэрээ дэвшүүлсэн хүмүүсийг хараад л “Арай ч дээ. Тэдний дэргэд би” хэмээн бодож, нэг л өглөө шийдвэрээ гаргачихсан нэгэн. Энэ тухайгаа ч тэрбээр “Надад Ерөнхийлөгчийн сонгуульд нэр дэвших бодол ер төрж байгаагүй” хэмээж байх вэ. Өдгөөгийн Ерөнхийлөгч Х.Баттулгатай арсалдан, өрсөлдөгч АН-ын гишүүдтэйгээ тэмцэлдэн байж гарч ирсэн түүнийг дэмжигчид харин хэр жин дарах бол оо.  Учир нь, УИХ дахь АН-ын бүлгийн гишүүд О.Цогтгэрэлийн талд байгаа. Ганц дайчин ганцаардахгүй гэгчээр урагш зүтгээд байхаас өөр арга түүнд үлдээгүй. Ямартай ч, Сонгуулийн ерөнхий хороо АН-ын нэр дэвшигч гэдгээр албан ёсоор бүртгэн, нэр дэвшигчийн үнэмлэхийг нь олгосон. Тэгэхээр эцсээ хүртэл өрсөлдөж таарна. Амьдрал баян юм хойно хэсэгтээ л “давхина”. Мэдээж байгаа бүхнээрээ дэнчин тавина. Эс бөгөөс 2021 оны Монгол Улсын Ерөнхийлөгчийн сонгуульд нэр дэвшин өрсөлдсөн гэдэг бахархалт түүхийг намтартаа бичиж үлдээнэ.

Элит тодотголтой Д.Энхбатын намтар түүх тийм ч арвин биш

Нийгэмд элит гэсэн тодотголтой яваа Д.Энхбатын намтар түүх тийм ч арвин биш. УИХ-ын гишүүн асан, Монголын ногоон намын даргаар ажиллаж байсан, “Датаком”-ын гэдгээрээ олонд танигдсан нэгэн. “Зөв электорат эвсэл”-ээс Монгол Улсын Ерөнхийлөгчид хэнийг нэр дэвшүүлбэл дэмжих вэ гэсэн санал асуулгыг улс даяар явуулахад арван  эрхэм дээгүүрт жагссан. Тэдний дээгүүрт  жагссан нь Д.Энхбат гэдэг. Тиймдээ ч түүнийг нэр дэвшүүлбэл нэр цэвэр, гар цэвэр гэж үзсэн бололтой. Саяхан тэрбээр гэр бүлийн хамт талбай дээгүүр алхаж яваа зургаа цахим орчинд дэлгэсэн нь нэлээдгүй хандалт авсан. Даашинзны хормойгоо дэрвүүлэн, нөхрөө сугадан алхаж буй эмэгтэйн төрх хэн бүхэнд таалагдсан. Энэ ч үүднээсээ элит гэр бүл хэмээн цоллоход ихээхэн ойртсон биз ээ. У.Хүрэлсүх, С.Эрдэнэ биш бол өөр хэн ч яах вэ. Ийм бодолтой яваа сонгогчид харин Д.Энхбатад саналаа өгч болох юм. Түүнээс бус хүсэж, хүсэмжилсэн нэр дэвшигч, лидер тэрбээр огтоос биш юм. Гэвч тэрбээр Монгол Улсын Ерөнхийлөгчийн сонгуульд нэр дэвшин, хэн бүхэнд олдоод байдаггүй боломж гарт нь орсон болохоор бүхнээ дайчилж, бүхнээрээ дэнчин тавина гэсэн үг юм.

У.Тэргэл