УИХ-ын гишүүн, БШУ-ны сайд Л.Энх-Амгалангийн амь насанд заналхийлсэн ноцтой хэрэг өчигдөр буюу тавдугаар сарын 22-ны өдрийн 16:40 цагийн орчимд гарсан талаар бид өмнө нь мэдээлсэн билээ.

Тэгвэл Л.Энх-Амгалан сайд руу Д.Совд гэх залуу халдсан байна. Тэрбээр, Улсын хэмжээнд 18 насанд хүрээгүй маш олон хүүхдүүдэд Элсэлтийн ерөнхий шалгалтаар нь дарамталж хүчээр ХЯТАД вакцин хийснийг эсэргүүцэж, салбарын сайд руу халдахыг завдсан аж.

Д.Совд: Монгол хүүхдүүд туршилтын туулай чинь биш шүү Боловсролын сайд аа 

Д.Совд нь хүүхдүүдэд хүчээр вакцин хийж байгааг цахим хуудсаараа дамжуулан удаа дараа эсэргүүцэж байжээ. Энэ талаар тэрбээр "АНХААР: ХҮҮХДЭД ХЯТАД ВАКЦИН ХҮЧЭЭР ХИЙЖ БАЙГААГАА ЯАРАЛТАЙ ЗОГСОО.

ЭEШ өгөх гэж байгаа хүүхдүүдэд хүчээр ХЯТАД вакцин хийхээ яаралтай зогсоож, ийм шийдвэр гаргасан Боловсролын сайд, холбогдох шат шатны буруутай хүмүүст яаралтай ХАРИУЦЛАГА тооцохыг шаардаж байна. 18 нас хүрээгүй хүүхдүүдэд ЭEШ-т өгөх бол заавал вакцинд хамрагд гэж хүчээр Хятад вакцин хийж байгааг эсэргүүцэж байна.

ДЭМБ-с хүлээн зөвшөөрөөгүй байхад яахаараа Монгол хүүхдүүд дээр туршиж хийдэг юм бэ. Монгол хүүхдүүд туршилтын туулай чинь биш шүү Боловсролын сайд аа Л.Энх-Амгалан. Бид бүгдийн ИРЭЭДҮЙ болсон үр хүүхдүүддээ ЗӨВ, ШУДАРГА, ХҮНЛЭГ нийгмийг хүлээлгэн өгөхийн төлөө хүн бүр ОДОО л зөв тууштай хамтдаа тэмцэх хэрэгтэй байна " хэмээн бичиж байсан байна. 

Д.Совд нь Боловсролын яаманд газрын дарга, Хүнс хөдөө аж ахуйн яаманд томоохон албан тушаал хашиж байжээ. Хөвсгөл аймгийн харьяат тэрбээр өнгөрсөн 2020 оны УИХ-ын сонгуулийн үеэр Хөвсгөл аймагт нэр дэвшиж байжээ.  

Л.Энх-Амгалан: Захиалгаар намайг удаа дараа гүтгэгч балмад нөхөр миний амь насанд халдах оролдлого хийлээ

БШУ-ны сайд Л.Энх-Амгалан ЭЕШ-ийн шалгалтанд орох хүүхдэд вакцин хийхгүй 2020 онд УИХ-ын сонгуульд зориудаар захиалгаар нэг тойрогт нэр дэвшиж, улс төрийн зорилго, захиалгаар намайг удаа дараа гүтгэгч балмад нөхөр миний амь насанд халдах оролдлого хийлээ гэдгийг мэдэгдэв. Тэрбээр "Насанд хүрээгүй ЭЕШ -ийн шалгалтанд орох хүүхдэд вакцин хийхгүй ээ гэдгийг нийт эцэг эхчүүддээ салбарын сайдын хувьд хариуцлагатай хэлсэн.

Монгол Улсын засгийн газар болоод Боловсрол, шинжлэх ухааны яамнаас, мөн миний зүгээс ийм шийдвэр болоод үг, үйлдэл хийгээгүй болохыг мэдэгдэж байна.

Мөн энэ сэдвээр далимдуулж 2020 онд УИХ-ын сонгуульд зориудаар захиалгаар нэг тойрогт нэр дэвшиж, улс төрийн зорилго, захиалгаар намайг удаа дараа гүтгэгч балмад нөхөр миний амь насанд халдах оролдлого хийлээ" хэмээн байр сууриа илэрхийлжээ. 

Б.Баатар