УИХ-ын дарга Г.Занданшатар бизнес эрхлэгчидтэй уулзаж, цар тахлын үед авч хэрэгжүүлж байгаа арга хэмжээ болон тулгамдаж байгаа асуудлыг хэрхэн шийдвэрлэх талаар санал солилцох үеэрээ нэгэн таатай мэдээг дуулгалаа.

Тэрбээр “Цар тахлаас болж үйл ажиллагаа нь доголдсон аж ахуйн нэгжүүдийг нэг гараанаас гаргах, их сэргэлтийн бодлогыг Монголын худалдаа аж үйлдвэрийн танхимаас дэвшүүлж байгаа. Өнөөдөр Монголбанктай ярьж байгаад зарим саналыг хүлээн авч, шийдвэрлүүлэхээр болж байна.

Тухайлбал, Монголбанкны зээлийн мэдээлийн санд бүртгэлтэй байгаа 71 мянган иргэний муу зээлийн хар жагсаалтын мэдээллийг харагдахгүй болгож, цагаатгахаар боллоо. Мөн бизнесийн байгууллагын зээлийн мэдээллийн санд бүртгэлтэй муу зээлийг хар жагсаалтаас нэг удаадаа хасч, цагаатгана. Энэ бол өршөөл биш, нэг удаагийн тохируулга юм. Харин цаашдаа иргэн, аж ахуйн нэгжүүд муу зээл, муу түүх үүсгэхгүй байх нь маш чухал. Хэрвээ дахин үүсгэвэл нээлттэй харагдаад явна гэдгийг ойлгоорой” гэв.

МҮХАҮТ-ийн Ерөнхийлөгч О.Амартүвшины санал, санаачилга, шаардлага ийнхүү биеллээ олж, олон аж ахуйн нэгж, иргэний нуруу тэнийх нь.

У.Тэргэл