Улстөрчид сурталчилгаагаа хийхийн тулд нисдэг тэрэг хөлөглөж явахад эмч нар бяцхан зүрхнүүдийг аврахын тулд цаг хугацаатай уралдан "мөлхөж" явна.

Монгол Улсын Ерөнхийлөгчийн сонгуулийн сурталчилгаа эхлээд нэлээд хэд хоног өнгөрч байна. Нэр дэвшигчид энэ хугацаанд орон нутагт сурталчилгаагаа хийхээр нисдэг тэрэг хөлөглөн давхиж буй. Энэ нь ч олны анхаарлыг татаж, шүүмжлэлд өртөөд амжсан. 

Тэгвэл "Зүрх мартахгүй" төслийн "Хязгаараас чанад” багийнхан тавдугаар сарын 26-ны өдрөөс Хэнтий, Дорнод аймгуудад ажиллаж байгаа.

Тэдний зорилго нь нэг ч болтугай гэсэн бяцхан зүрхийг аврах. Гэтэл тэдэнд улстөрчид шиг нисдэг тэрэг хөлөглөж, тансаглах боломж байсангүй. Харин шавар, бороо, цас, бартаа саадыг үл хайхран бусдын амь насыг аврахын төлөө зүтгэж байгаа нь үнэхээр бахархах сэтгэл төрүүлэв.

"Хязгаараас чанад" багийн эмч нар зүүн аймгаар явж, зүрх судасны өвчтэй 200 гаруй хүүхдэд үзлэг хийж, шаардлагатай тохиолдолд хагалгаа хүртэл хийж байгаа аж. Тухайлбал,  "Хязгаараас чанад" багийнхан тавдугаар сарын 31-ний өдөр Чойбалсан хотод 1.5 см өргөнтэй хаагдаагүй судсыг боож, бяцхан зүрхэнд амьдрал бэлэглэсэн байна. Мөн зүрх ба цээж, том судас, уушгины мэс засалд орох заалттай насанд хүрсэн иргэдийг хүртэл үнэ төлбөргүй үзэж байгаа юм. 

Гэтэл тэдний энэхүү сэтгэлийг зарим нэг нь улстөржүүлэх болжээ. Энэ талаар "Зүрх мартах"-гүй төслийн "Хязгаараас чанад" багийн ахлагч Б.Болдсайхан эмч "Би нам бус, намын гишүүн хүүхэд гэж үгүй. Хүүхдийн зүрх, амь нас, хагалгаа улс төр, сонгууль, намуудтай огтхон хамаагүй гэж боддог. Сонгууль, тахал, бороо, шавар аль нь ч хамаагүй сөрөөд хөдөө сумдаар үзээд явж буйг аль нэг нам, сонгуультай цэгийн төдий бүү холбоорой" хэмээн цахим хуудаснаа бичжээ. 

Б.Болдсайхан эмч нэгэнтээ "Энэ нас төгсгөлтэйг сануулсаар л ... хавдрын маркерууд дахиад өсөж ... хими давхар тунгаар 28 хоногоор явж байгаа ч ... цаг хугацаатай уралдаад 1000 хүүхэд эрүүл болгоно оо ... юмс үзэгдэл бүр зуурхан цахилаад чинагш одох ..." хэмээж байсан билээ.  Үнэхээр тэр бусдын төлөө амьсгалж, амьдарч яваа энэ цагийн баатар юм. 

Б.Баатар