Монгол Улсын Ерөнхийлөгч Х.Баттулгын бүрэн эрхийн хугацаа удахгүй дуусгавар болно. Үүнээс өмнө тэрбээр үе үеийн Ерөнхийлөгч нарынхаа уламжлалыг дагаж шагналын “хур” буулгаж байна. Гэтэл дэлхий нийтээрээ цар тахалтай тэмцэж байгаа энэ үед олон хоног хавтгайруулан шагнал гардуулах нь халдварын тархалтыг нэмэгдүүлэх нөхцөлийг бүрдүүлж байна.

Хамгийн гол нь сүүлийн долоо хоног Төв талбай олны хөлд дарагдлаа. Шинэхэн Хөдөлмөрийн баатар, гавьяатууд, Алтан гадастнууд төрж, Монголын зэвсэгт хүчний бие бүрэлдэхүүнд “Чингис хаан” одон” хүртээж, Хүүхдийн баяртай холбоотойгоор ээжүүд хүртэл Эхийн алдар I, II одонгоо авав.

Төрийн одон, медаль авсан олон арван хүнийг дагасан гэр бүлийнхэн, найз нөхөд, ажлын хамт олон гээд олон мянган хүн Төв тайлбай дээр баяр наадмын байдалтай өнжсөн өдрүүд үргэлжилж байна. Мөн шагнал дагасан найр наадам ч гадуур цөөнгүй болсоор байна. Үүнтэй зэрэгцэн сүүлийн өдрүүдэд короновирусний цар тахлын тоо эрс өслөө.

Тодруулбал, хөл хориог тавьснаас хойш тодорхой хэмжээгээр буурч байсан цар тахлын халдварын тоо сүүлийн хоёр хоногт эрс өсөв. Өнөөдрийн 11.00 цагийн байдлаар батлагдсан тохиолдол 1143 болж нэмэгдсэн байна.

Ерөнхийлөгч улс эх орон, салбартаа гавьяа байгуулсан шилдэг ажилтан, хамт олонд Төрийн шагнал хүртээж байгааг буруутгах аргагүй. Гэхдээ цар тахлын нөхцөл байдалтай энэ үед олон арван хүнд хэдэн өдөр дараалан хавтгайруулан шагнал өгч, Төв талбайд олон зуун хүн цуглуулах нөхцөл бүрдүүлсэн нь цар тахлын тоо эрс өсөх шалтгаан болж буйг үгүйсгэх аргагүй юм.