Монгол Улсын зургаа дахь Ерөнхийлөгч ердөө зургаа хонгийн дараа тодорно. Сонгуулийн сурталчилгааны энэ өдрүүдэд Ерөнхийлөгч бүрэн эрхийнхээ хүрээнд амжиж “одон”-гийн хур буулгаж, түүнийг төрийн түшээд нь хөдөөгүүр тарааж, намаасаа нэр дэвшигчээ дэмжиж санал өгөхийг иргэд, сонгогчдодоо учирлаж буй сурагтай.

Сайн малчин өрх, Одонтой ээжийн I, II зэрэг Ерөнхийлөгчөөс тодорхойлсон бусад шагналын нутгийн иргэддээ биечлэн тараах завшаанаар ухуулах ажил давхар ийж буй гэнэ. Үүнтэй холбогдуулан байнгын хороодын ирц ч хүрэхгүй хуралдаан нь хойшилж, чуулганаар хэлэлцэх асуудалгүй болсон юм байх.

Нэр дэвшигчдийн хувьд өөрсдийгөө хэр сайн удирдагч байж чадах вэ гэдгээ баталж, иргэдийг ятгах тавхан хоногийн хугацаа үлджээ.

Энэ удаагийн сонгуульд парламентад суудалтай гурван намаас нэр дэвшигч өрсөлдөж байгаа бөгөөд тэд ирэх даваа гарагт халз мэтгэлцэх хуваарь гарсан. Уг мэтгэлцээнээс иргэд бид хэнийг зургаан жил төрийн тэргүүнээрээ сонгох вэ гэдэгт оюун дүгнэлт хийх, эцсийн шийдвэрээ гаргахад чухал нөлөөтэй гэж хэлж болох юм.

Юутай ч жаран чавганц уралдахад нэг нь түрүүлдэг шиг сонгууль жамаараа л болж өндөрлөнө. Харин тойрогтоо ажиллах нэрээр одон тарааж, хурал цуглааныг хавтгайруулж намын нэр дэвшигчдээ оноо авах гэсэн гишүүдийн оролдлогоос болж төрийн ажил цалгардаж байна.

Б.Лхам