Монгол Улсын Ерөнхий сайд Л.Оюун-Эрдэнэ Сүхбаатар дүүрэгт ажиллаж байна.

БНХАУ-аас Монгол улсад олгож буй 350 сая юаны буцалтгүй тусламжийн хөрөнгөөр Сүхбаатар дүүргийн “Ногоон нуур” орчим 1008 айлын орон сууцны төсөл хэрэгжүүлэхээр болсон. Гэр хорооллын дахин төлөвлөлтийн хүрээнд хэрэгжих “Ногоон нуур" 1008 айлын орон сууц нийт найман блок, 21 давхар байхаар төлөвлөгджээ. Давхартаа зургаан айл байх бөгөөд 50 мкв, 55 мкв байх аж. Барилга хүлэмжийн хий бага ялгаруулдаг, ногоон орон сууц учраас агаарын бохирдлыг бууруулахад тодорхой хэмжээгээр нөлөөлнө гэж үзэж байгаа юм байна.

Хятадын Засгийн газар санхүүжилтийг бүрэн шийдэж, ерөнхий гүйцэтгэгч болон зөвлөх үйлчилгээ үзүүлэх компанийг Хятадын талынх байхаар тохиролцжээ. Манай талаас барилга эхлэхээс дуусах хүртэл бүх зохион байгуулалтыг хийж ажиллана гэлээ.

4.2 га талбай газар чөлөөлсний 10 хувьд нь барилга барьж, үлдсэн газрыг ногоон байгууламжийн хэлбэрээр шийдэхээр зураг төсөлд тусгасан байна. Гэрээний хүрээнд нийт 800 гаруй хятад ажилчин орж ирэх байсан бол коронавирусний нөхцөл байдлыг үндэслэн 240 орчим ажилчин оруулж ирэхээр болжээ.

Б.Лхам