Хууль зүй дотоод хэргийн сайд Х.Нямбаатарын санаачлан батлуулсан Зөрчлийн тухай хууль өнөөдөр олон айл өрхийн хоолыг булааж, хоосон хонуулахад хүргээд байна. Цар тахлын улмаас ажил, орлогогүй болсон иргэдийн нуруунд даашгүй хүнд ачаа үүрүүлсэн эрхэм сайдтан хэрхэн бүтэн нойртой хонодог юм бол доо. Хамгийн эмгэнэлтэй нь, энэхүү хуулиар иргэд сөхөрч, улсын төсөв зузаарч байгаа юм.

Тухайлбал, өнгөрсөн 2020 онд гэхэд л Зөрчлийн тухай хуулиар давхардсан тоогоор 5,9 сая хүн, 73800 аж ахуйн нэгжийг 173.000.000.000 төгрөгөөр торгожээ. Зөвхөн цагдаагийн байгууллагад гэхэд л Зөрчлийн тухай хуулиар 2020 онд давхардсан тоогоор 2.2 сая хүнд 66 тэрбум төгрөгийн торгууль ногдуулсан байна. 

Иргэд өөрсдөө цалин орлогогүй болчихсон, дээрээс торгууль нь нэмэгдээд төлж чадахгүйд хүрч, өөрөөр хэлбэл,  иргэд, аж ахуйн нэгж бүгд торгуультай, ямар нэгэн байдлаар хариуцлага үүрсэн ялтай болж хувираад байна. Иймээс Зөрчлийн тухай хуулийг өөрчилж, хүмүүсийг хэвийн ажиллаж амьдрах боломжийг олгооч.

Хатуу харгис энэхүү хуулиа эргэн хараач  гэдэг хүсэлтийг хуульчид, иргэд, аж ахуйн нэгжүүд төр, засагт хэдэнтээ тавиад ч нэмэр алга. Хамгийн сүүлд гэхэд л МҮХАҮТ-ийн Ерөнхийлөгч О.Амартүвшин Ерөнхий сайдад хаяглаж, онцгойлон хандаад буй.  

Өмнө нь УИХ-ын гишүүн Б.Пүрэвдорж  Зөрчлийн торгуулийг нэг удаадаа хүчингүй болгож, өршөөл үзүүлэх тухай хуулийн төсөл санаачилснаа мэдэгдэж, сүржин зарлаж байв. Гэвч энэ нь эцэстээ олон жил хуримтлагдсан өөрийнхөө торгуулийг хүчингүй болгуулах байсан нь ил болж, олны шившиг болсон. Бас ч болоогүй согтуугаар автомашинтайгаа “нисч” азаар эсэн мэнд үлдсэн ч түүний энэ үйлдэл олон залууст муу үлгэр дууриалал болсон нь гарцаагүй. Хариуцлагагүй, дэндсэн энэ үйлдэлд нь УИХ-ын зүгээс ёс зүйн ямар ч шийтгэл ногдуулаагүй нь хачирхалтай.

Ийнхүү  Б.Пүрэвдорж гишүүн олныг бодож байгаа нэрийдлээр өөртөө ашигтайгаар Өршөөлийн хууль санаачилж суухад Х.Нямбаатар гишүүн олон мянган ядарсан иргэдийнхээ халаас руу гар дүрж, 173 тэрбумыг “суйлчихаад”  жишим ч үгүй сууна. Хамгийн гол нь, иргэдийнхээ идэх хоолноос хумслан байж албадан авсан мөнгийг эргүүлээд төр, засгийн хайр хишиг мэтээр тарааж суугаа нь   энэ төрийн эмгэнэл гэлтэй.

У.Тэргэл