Монгол Улсын Ерөнхийлөгчийн сонгуульд нэр дэвшигчдийн халз мэтгэлцээн энэ сарын 7-ны 17.30 цагт болох талаар бид өмнө нь мэдээлсэн билээ. Тус мэтгэлцээнийг Монголын үндэсний олон нийтийн радио телевиз болон “MM World” сувгуудаар шууд дамжуулах юм. Халз мэтгэлцээн нийт 2 цаг 30 минут үргэлжлэх бөгөөд нэг хөтлөгч хөтлөн явуулах аж. Түүнчлэн хэн хаана зогсох, асуултад хэн түрүүлж хариулах, мэтгэлцээнийг хэн хаах гэх мэт зохион байгуулалтын асуудлыг сугалаагаар шийдэхээр болсон байна. Сугалааг энэ сарын 6-нд буюу халз мэтгэлцээний өмнөх өдөр явуулж, бүх зүйлийг тодорхой болгох юм. 

Энэ талаар МҮОНРТ-ийн гүйцэтгэх захирал А.Бүрэнбаатар “Мэтгэлцээний асуултыг хоёр хэсгээс бүрдүүлнэ. Тодруулбал, олон нийтээс санал авахаас гадна асуулт боловсруулах ажлын хэсгийг байгуулсан. Мэтгэлцээн Монгол Улсын үндэсний аюулгүй байдал, Батлан хамгаалах, Гадаад бодлого, Шүүх засаглал, эдийн засаг болон нийгмийн харилцаа гэсэн үндсэн таван хэсгээс бүрдэнэ. Бид нэр дэвшигчдээ энэ таван сэдвийн хүрээнд бэлтгэл хангах чиглэл өгсөн. Сурталчилгааны хугацаа 14 хоног байгаа учраас нэг л удаа мэтгэлцээнийг зохион байгуулахаар нэр дэвшигчдийн ерөнхий менежерүүдтэй ярьж тохирсон” хэмээжээ. 

Б.Баатар