Ардчилсан нам УИХ-д өдгөө 13 суудалтай. Хамгийн сүүлд С.Ганбаатараар бүл нэмсэн тэд сөрөг хүчин гэдэг утгаараа үгээ хэлж, үзэл бодлоо илэрхийлсээр ирсэн. Ялангуяа Монгол Улсын Ерөнхийлөгчийн сонгуульд нэр дэвшигчтэй холбоотой тэдний тэмцэл хэсэгтээ өрнөж, Төв талбайд өлсгөлөн хүртэл зарласан билээ.
Ардчилсан нам дотооддоо хоёр хуваагдан эцэстээ АН-ын туган дор Монгол Улсын Ерөнхийлөгчийн сонгуульд С.Эрдэнээ сойсон ч тэдний сөргөлдөөн ил, далд үргэлжилсээр байна.
Энэ мэт Ардчилсан намд тамга, тэмдгийн маргаан, Ерөнхийлөгчийн сонгууль, сөрөг хүчний дуу хоолойгоо хүргэх гээд завсар зайгүй үйл явдал өрнөсөөр, үүнд гол үүрэг гүйцэтгэгчид нь мэдээж УИХ дахь АН-ын бүлгийн гишүүд юм. Тэднээс Н.Алтанхуяг, Ц.Туваан, А.Адъяасүрэн, С.Ганбаатар, О.Цогтгэрэл, Д.Ганбат, Б.Бейсен, Н.Ганибал, Ж.Батсуурь гишүүн нар өлсгөлөн зарлаж, хэдийгээр цуварч, орж гарч байсан боловч итгэл үнэмшилдээ үнэнч байсан хүмүүс. Харин С.Одонтуяа гишүүний хувьд өлсгөлөнгөө зогсоо, зөвшилцлийн ширээний ард сууя хэмээн уриалаад ч дийлээгүй. Мөн Ш.Адьшаа гишүүний хувьд насаа бодоход түүнд өлсгөлөн арай л хатуудах байх.
Гэвч тэрбээр УИХ-ын танхимд сөрөг хүчний байр сууриа хадгалсаар ирсэн юм. АН-ын бүлгийн гишүүдээс бүхий л асуудалд зөв ч, буруу ч бай дуу хоолойгоо хүргэж ирсэн эрхэм бол Б.Пүрэвдорж юм. Гэвч тэрбээр автомашинтайгаа “ниссэн үзүүлбэр” үзүүлснээс хойш нам гүм болсон.
Харин УИХ дахь АН-ын бүлгийн 13 гишүүнээс нэгэн эрхэм чуулганы танхимд ч үзэгдэхгүй, бараа сураггүй байгаа нь “Ажнай” Д.Бат-Эрдэнэ юм. Түүний хувьд намд нь болж буй элдэв асуудал огтхон ч хамааралгүй бололтой. Төрийн ордноор ч үзэгдэхээ байсан түүнийг ийнхүү ор сураггүй болсонд “эрэн сурвалжилж” буй олон хүн байна.
Асуудлыг ухвал, УИХ-ын гишүүн Д.Бат-Эрдэнэ болон Ерөнхийлөгч Х.Баттулга нарын хоорондын тэмцэл ийнхүү АН-аа гэх сэтгэлд нь ус цацсан гэх. Тодруулбал, Д.Бат-Эрдэнэ гишүүн Монголын Боксын холбоог толгойлохоор болж, нэг тэрбум төгрөгийн хөрөнгө оруулалт хийсэн ч удалгүй түүнийг албан тушаалаас нь буулгасан. Тэрхүү хүн нь Ерөнхийлөгч Х.Баттулга аж. Ийнхүү тэдний хооронд том ан цав үүсч, өдгөө өстөн болсон гэцгээх. Ямартай ч, УИХ дахь АН-ын бүлгийн нэг гишүүнийг танхимынх нь нөхдөөс эхлүүлээд олон хүн “эрэн сурвалжилж” буйг дуулгая.
У.Тэргэл
