Сүүлийн хэдэн өдөр Төв талбай олны хөл дарагдаж, коронавирусний цар тахал "мартагдав". Сар хүрэхгүй хугацааны өмнө халдварын эрсдлээс шалгаалж, хөл хорио тогтоож байсан улсын нийслэлд өнөөдөр түм түжигнэж байна. 

Монгол Улсын Ерөнхийлөгч Х.Баттулга тавдугаар сарын 26-наас эхлэн Алдарт эхийн одон, төрийн шагнал гардуулж буй нь цар тахлын энэ хүнд үед нүдээ олоогүй үйлдэл болж, олны шүүмжлэлийг дагуулав. Нийт 10843 Алдарт ээжид одон гардуулахаас 4224 нь орон нутагт байгаа юм. Төрийн шагнал гардуулах үйл ажиллагаа энэ сарын 6-ныг дуустал үргэлжилнэ.

Цар тахлын халдвар буураагүй, эрсдэл хаа сайгүй байгаа энэ үед ийнхүү олон хүн нэг дор цугларч буй нь эрсдэлийг улам бүр нэмэгдүүлж байна гэдгийг албаныхан хэлж, анхааруулсаар байна. Гэвч шагналын хур тасралтгүй буусаар.

Түүнчлэн төрийн дээд одон медалийг энэ мэтээр хатгайруулан гардуулж буй нь шагналын үнэ цэнийг алдагдуулж байна гэдгийг ч хэлэх хүн олон байна. 

Хамгийн гол асуудал нь хөл хорио бүрэн тавигдаагүй, бага  насны хүүхдүүд вакцинд хамрагдаагүй байхад ийнхүү өдөр бүр шагнал гардуулж, олон нийтийг цуглуулсан нь халдвар нэмэгдэх эрсдэл бий болгож байгаа юм.

Р.Алтан