Ерөнхийлөгчид нэр дэвшигч Д.Энхбат эхнэрийнхээ хамт коронавирусын халдвар авчээ. Д.Энхбат тэр тухайгаа өнөөдөр /2021-6-5/ твиттерт жиргэсэн байна. Тэрээр эхнэрийн хамт, бас эмч, хамгаалалтын ажилтнаас нь коронавирусын халдвар илэрч, шинжилгээний "эерэг" дүн гарчээ. Өөрийнх нь хэлснээр, "Синофарм"-ын эхний тунг тариулжээ. Харин хоёр дахийг нь хийлгэх гэтэл олон нислэгийн өмнө таарсан учраас хямрахаас болгоомжилж хойшлуулсан гэв.
Эх сурвалжийн мэдээллээр, Д.Энхбат нь өчигдөр энэ шинжилгээний дүнг мэдээд Булган аймгийн иргэдтэй хийх уулзалтаа цуцалжээ. Тиймээс үдээс хойш нь эхнэр Д.Оюунцэцэгийгээ Эрдэнэтээс Улаанбаатар руу онгоцоор буцаажээ. Д.Энхбат өмнөх өдөр нь Дархан, Сэлэнгэ аймагт, өнөө өглөө Эрдэнэтийн иргэдтэй уулзалт хийсэн юм. Д.Энхбат уг нь вакциныг таашаадаггүй нэгэн аж. Тэрээр 2020 оны 8-р сарын 20-нд "Вакцин гармагц л тариулж болохгүй юм байна. Вакцины түүх, судалгааны тухай сонирхолтой кино үзлээ.
Олон вакциныг хүчтэй сөрөг нөлөөтэй байсан учир зогсоож байсан юм байна. Мөн олон нь их олон төрлийн муу үр дагавартай явж иржээ. Жижиг улс бусад улс орнуудыг ажиглах хэрэгтэй юм байна" гэж жиргэжээ. Гэхдээ Д.Энхбат 2021 оны 5-р сарын 2-нд "Би Монгол Улсын Ерөнхийлөгчийн 2021 оны ээлжит сонгуульд "Зөв хүн-Электорат" эвслээс нэр дэвшихийг зөвшөөрч байна" гэж мэдэгдсэн өдрөө вакцины эхний тунд хамрагдсан байгаа юм.
Сэтгэгдэл (22)