Монгол Улсын Засгийн газрын ээлжит хуралдааны шийдвэрийг Ерөнхий сайдын хэвлэлийн төлөөлөгч Ч.Болортуяа танилцууллаа. Тэрбээр Засгийн газрын хуралдаанаас гарсан шийдвэрийг эхнээс нь танилцуулж байна гэлээ. Үүнд,

1. Иргэдийг жилд нэг удаа эрүүл мэндийн эрт үзлэгт хамрагдах боломжоор хангах хөтөлбөр боловсруулах чиглэлийг Эрүүл мэндийн сайдад өглөө. Монгол Улсын хувьд нас баралтын тэргүүлэх шалтгаан нь зүрх судасны шалтгаант өвчин. Мөн хоёрдугаарт хавдарын өвчлөл орж байна. 2010 онд хорт хавдрын 4000 гаруй тохиолдол илэрсэн бол 2020 онд 6000 гаруй болж нэмэгдсэн байна. Шинээр оношилсон хорт хавдрын 70 гаруй хувь нь хожуу үедээ илэрч байгаа. Иймд насанд хүрсэн иргэдээ жилд нэг удаа эрүүл мэндийн эрт үзлэгт хамруулахаар төлөвлөсөн.
2. Нийслэл хотод тулгамдсан асуудлыг цогцоор шийдэхээр болжээ. Тухайлбал, тавдугаар сарын 10-нд Засгийн газрын өргөтгөсөн хуралдаан болж, асуудлыг цогцоор нь хэлэлцсэн. Сүүлийн сар гаруйн хугацаанд Засгийн газрын тэргүүн болон холбогдох албаныхан нийслэлийн зургаан дүүрэгт ажилласан. Дүүргүүдэд ажилласан тэмдэглэлийг өнөөдрийн хуралдаанаар хэлэлцэж, тодорхой шийдвэрийг гаргана.
3. Эрүүл мэндээ хамгаалж, эдийн засгаа сэргээх 10 их наядын цогц төлөвлөгөөний хэрэгжилтийг Сангийн яамнаас танилцууллаа. 8768 иргэнд гурван хүүтэй зээлийг олгожээ. Ажлын байрыг дэмжих зээлийн хүрээнд 62,132 ажлын байрыг хамгаалж үлдсэн байна. Өнөөдрийн байдлаар 11193 зээлдэгч зээл авсан байна. Шаардлагатай гэж үзвэл эх үүсвэрийг гурван их наяд болгон нэмэгдүүлэх боломжтой тухай чиглэл өгсөн" гэлээ.

У.Тэргэл