УИХ-ын гишүүн Б.Пүрэвдорж, УИХ-ын гишүүн асан Х.Тэмүүжин, З.Нарантуяа нар Ардчилсан намын Онц их хурал зарлаж, эв нэгдлээ хангах 100000 гишүүний гарын үсэг цуглуулах санаачлага гаргаж буй талаараа мэдээлэл хийлээ.

Тухайлбал, УИХ-ын гишүүн Б.Пүрэвдорж “Энэ удаагийн Ерөнхийлөгчийн ээлжит сонгуулиар АН 1990 оноос хойш хамгийн бага санал авлаа. Тиймээс талцаад буй намыг нэгтгэхгүй бол цаашид ч улс төрийн хамгийн бага үзүүлэлттэй байх болно гэдгийг гишүүд дэмжигчид хэлж байгаа. Улсын дээд шүүх намын дотоод эв нэгдлээ хангах хэрэгтэй гэсэн шалтгаанаар АН-ын бичиг баримтуудыг буцаасаар байгаа.

Тиймээс АН-ын дотоод эв нэгдлийг хангах, намын удирдлагуудыг нэгтгэх үүднээс 100 мянган гишүүний гарын үсэг цуглуулах аяныг эхлүүлж байна. Ингээд маргалдагч талыг аль алийг нь оролцуулж, нэг удирдлагатай болгох нь намын ирээдүйд туйлын чухал. Тиймээс гарын үсэг зурах аянд нэгдэхийг УИХ-ын гишүүн Б.Пүрэвдорж АН-ын гишүүдэд уриалав.

Харин УИХ-ын гишүүн асан Х.Тэмүүжин "Эв нэгдэлтэй Ардчилсан намыг бий болгохын тулд мянга, мянган гишүүдээсээ гарын үсэг авах үйл ажиллагааг эхлүүлж байна. Ардын намын дэмжлэгтэй тамга авах биш нийт гишүүдийнхээ саналыг сонсъё" гэлээ.