Ардчилсан нам хөл толгойгоо алдаад удав. Үүнийхээ шанг ч саяхан болж өнгөрсөн Ерөнхийлөгчийн сонгуулиар амссан. Хатуухан хэлэхэд, тэд Ардчилсан намын түүхэнд байгаагүй хамгийн бага санал авч, "шившиг" болсон. Харин үүнийхээ буруутныг  бусдаас хайж буй. 

2020 оны УИХ-ын сонгуулиас хойш өөдлөөгүй Ардчилсан намынхан өнөөдөр шинэчлэл ярьж, сайхан үгс цухалзуулсаар сууна.

Ардчилсан намын гишүүн Д.Пүрэвдорж, З.Нарантуяа, Х.Тэмүүжин нар өчигдөр мэдээлэл хийсэн. Тэд Ардчилсан намын Онц Их хурлыг хуралдуулах санал гаргаж, 100 мянган гишүүний гарын үсэг цуглуулж эхэлсэн гэдгээ дуулгасан билээ. Цагтаа намын дэд даргаар ажиллаж, өнөөгийн Ардчилсан намын түүхийг бичилцсэн эрхмүүд гэнэт ийнхүү “хэл" орсон  нь олны эгдүүцэл, эргэлзээ аль алийг нь төрүүлэв.

Тодотговол, Намаа шинэчилж нэгдэлд уриалах дээрх эрхмүүдийн үнэн төрхийн цаана Ерөнхийлөгч асан Ц.Элбэгдоржийг байна гэх хардлага нийгэмд хөвөрч байна. Нэг үгээр хэлбэл, 2020 оны аравдугаар сард намын гишүүнчлэлээ сэргээсэн түүний дараагийн нүүдэл нь Ардчилсан нам руу, цаашлаад улс төр рүү орох. Тиймээс өдгөө ийнхүү өөрсдийн хүмүүсээ турхирч эхлэв бололтой.

Ардчилсан намын гишүүн Д.Пүрэвдорж, З.Нарантуяа, Х.Тэмүүжин нарыг Ц.Элбэгдоржийн талынх гэдгийг ч олон нийт андахгүй. Түүнийг Ерөнхийлөгч байхад Х.Тэмүүжин Хууль зүйн сайдаар ажиллаж, мандаж явсан нэгэн. Д.Пүрэвдоржийн хувьд  нутаг нугын хуурай дүү нь. Тиймээс ч Д.Пүрэвдоржийг намын дарга руу зүтгүүлж буй.

Энэ нь урьдаас бэлтгэсэн улс төрийн зураглал гэхэд хилсдэхгүй биз. Тэрбээр Ерөнхийлөгчийн сонгуульд С.Эрдэнийг нэр дэвшүүлж, улмаар унахаар нь намын даргын суудлыг авах байсан. Энэ нь өнөөдөр өрнөж буй үйл явдалтай яв цав нийцэж байна. Ерөнхийлөгч асан Ц.Элбэгдоржийн дараагийн нүүдэл тэд байв.

Б.Баатар