Монголын улс төр сонгуулиас сонгуулийн хооронд хөвөрч байна. Сонгинохайрхан дүүргээс УИХ-д сонгогдсон Д.Сумъяабазар нийслэлийн Засаг дарга болсноор тус дүүрэгт нөхөн сонгууль явахаар болсон. Мөн Ерөнхийлөгчийн 2021 оны сонгуульд У.Хүрэлсүх ялалт байгуулснаар Хэнтий аймгийн УИХ-ын сонгуулийн 18 дугаар тойрогт нөхөн сонгууль хийхээр  болоод буй.

Дээрх нөхөн сонгуульд нэр дэвших хүсэлтэй эрхмүүдийн талаарх "зэс" эхнээсээ цухуйгаад эхэлжээ. Тэд ил, далдуур өөр өөрийнхөө өнгө аясыг илэрхийлж байна. 

Тодруулбал, нөхөн сонгуульд экс Ерөнхийлөгч нар болоод өмнөх сонгуулиудад өвдөг шороодсон улстөрчид хүч үзэхээр болсон  гэдгийг албан бус эх сурвалжууд мэдээлж байгаа. Тэдний нэгээр 2021 оны Ерөнхийлөгчийн сонгуульд Ардчилсан намаас нэр дэвшиж, өвдөг шороодсон С.Эрдэнийг нэрлэж буй юм. Харин тэрбээр энэхүү мэдээллийг үгүйсгэж, цахим хуудаснаа "Намайг Сонгинохайрхан дүүрэгт нөхөн сонгуульд  нэр дэвших гэж байгаа мэтээр цуурч эхэлжээ. Намайг дэвшүүлэх гэж цуурхал тараасан нөхдөд  баярлалаа. Би улстөрчийн хувьд намдаа хийх ажил их байна. Хувь ажил амьдралаа зохицуулах зүйл их байна" хэмээн мэдэгджээ.

Угтаа түүнийг нөхөн сонгуульд нэр дэвших эсэх талаарх мэдээлэл мэдэгдэл, тайлбар хийх хүртэл хөврөөгүй.

Харин тэрбээр ийнхүү тайлбар хийсэн нь нөхөн сонгуульд нэр дэвших хүсэл нь цухалцаж байна уу гэх хардлагыг төрүүлж байгаа юм. Ардчилсан намаа хоёр ч удаагийн сонгуульд ялагдал хүлээлгэсэн түүний улс төрд үлдэх ганц гарц нь  нөхөн сонгууль байхыг үгүйсгэхгүй гэдгийг учир мэдэх хүмүүс хэлж байна. 

Б.Баатар