Сангийн сайд Б.Жавхлан нүүр хуудастаа “Хүүхдийн 100к, мөн цахилгаан, дулаан, ус, хогны төлбөрийг тэглэсэн өмнөх шийдвэрийн үйлчлэх хугацаа 2021 оны долоодугаар сарын 1-ний өдрөөр дуусч байгаа. Найзууд юу гэж бодож байна?” хэмээн тавлажээ. Юу бодох вэ, эрхэм сайд аа. Төр, засгаас авч хэрэгжүүлсэн дээрх арга хэмжээ иргэдийн амьдралд ихээхэн дэм болсон. Харин зогсохоор айл өрх, аж ахуйн нэгж, байгууллагууд ямар байдалд орохыг та хэнээр ч хэлүүлэлтгүй мэдэхийн дээдээр мэдэж байгаа. Тиймээс цаашид хөрсөн дээрээ бууж, хэрхэн яаж амьдрах вэ гэдгээ л бодож сууна. Ядаж байхад улстөржихөөс өөрийг мэдэхгүй төрийн түшээд, төр, засагтай. Өдгөө бүр “Өөрсдөдөө найдаарай. Амь амиа бодоорой” хэмээн нүүр буруулчихаад байгаа. Энэ цагт мөнгөний бодлогыг барьж байгаа эрхэм сайдтанаар амаа асуулгаж суух ч гэж дээ.

Б.Жавхлан сайдын доог, тохуу үүгээр тогтохгүй. Аливаа арга хэмжээнд очих бүртээ хэвлэлийнхэнд “Халамж, дэмжлэгийг долоодугаар сарын 1-нээс хэлснээрээ зогсооно” хэмээн мэдэгдэнэ. Араас нь холбогдох хүмүүс тайлбар хийнэ. Засгийн газрын Олон нийт, хэвлэл мэдээлэлтэй харилцах албаны дарга Ц.Ганзориг одоогоор эцэслэн шийдээгүй гэсэн бол МАН-ын бүлгийн дарга Д.Тогтохсүрэн төсөвт тодотгол хийх үеэр энэ асуудлыг ярьж, шийднэ хэмээсэн. Гэвч Б.Жавхлан сайд зогссонгүй. Тэрбээр ард түмнээ тавлаж, кайф авдаг бололтой. Цар тахал зарим нэгний үнэн нүүр царайг харамгүй харуулах юм даа.

У.Тэргэл