Улсын онцгой комиссын хуралдаан өчигдөр болж, хөл хорио тогтоохгүй, харин хатуу хязгаарлалт тавина гэдгийг мэдэгдсэн. Гэсэн ч ямар хязгаарлалт тавих нь тодорхойгүй байсан юм. Тэгвэл УОК-оос дараах шийдвэрийг гаргасан байна. 

Нэг. Халдварын тархалт үүссэн нөхцөл байдлын эрсдлийн үнэлгээнд үндэслэн засаг захиргаа нутаг дэвсгэрийн хэмжээнд хэсэгчилсэн байдлаар хорио цээр, хязгаарлалтын дэглэм тогтоох шийдвэрийг УОК-той зөвшилцөн гаргах, гаргасан шийдвэрийн талаар иргэд, олон нийтэд шуурхай хүргэж ажиллах,

Хоёр. Хот хооронд зорчигч тээврийн үйл ажиллагаа, түүгээр зорчих иргэдэд тавих хяналтыг чангатгах, шаардлагатай тохиолдолд тэдгээрт тавих тусгай шаардлага, нөхцлийг сайжруулах, 

Гурав. Худалдаа үйлчилгээ эрхлэгчид хууль журамд заасан шаардлага, халдвар хамгааллын дэглэм мөрдөх, чиглэлд тогтмол хяналт тавих, зөрчил гаргасан аж ахуйн нэгж байгууллага, иргэнд хуульд заасан арга хэмжээ авч, халдвар тархах эсрдэлээс урьдчилан сэргийлж ажиллах, 

Дөрөв. "Улбар шар түвшин"-д хязгаарласан үйл ажиллагаа явуулж буй аж ахуйн нэгж байгууллагын үйл ажиллагаанд хатуу хяналт тавьж, шаардлагатай тохиолдолд үйл ажиллагааг нь зогсоож, тусгай зөвшөөрлийг нь цуцлах хүртэл арга хэмжээ авч ажиллах, 

Тав. Эм эмнэлгийн хэрэгсэл, урвалж бодис, оношлуурын нөөцийг тогтмол бүрдүүлж, шаарлагатай санхүү төсөвт зохицуулалт хийх,

Зургаа. Вакцинжуулалтын дараах дархлаа тогтоцын судалгааны ажлыг өргөжүүлэх, шаардлагатай санхүүжилтыг шийдвэрлэх,

Долоо. Вакцинжуулалтын 3 дугаар тунг хийгдэх эсэх талаарх судалгааг эцэслэж, дүнг УОК-т танилцуулах, 

Найм. Коронавируст халдварын батлагдсан тохиолдол ойрын хавьтал болсон иргэдэд эрүүл мэндийн тусламж үйлчилгээ үзүүлэх үйл ажиллагаанд боловсролын салбарын эмч, эмнэлгийн ажилтан, АШУҮИС-ийн ахлах болон төгсөх дамжааны оюутнуудыг дайчлан ажиллуулах, тэдгээртэй холбогдон гарах цалин, урамшууллыг шийдвэрлэх, 

Ес. Үйл ажиллагааг нь нээсэн худалдаа үйлчилгээний салбаруудын цагийн хуваарьт хязгаарлалт, зохицуулалт хийж, халдвар тархах эрсдлээс урьдчилан сэргийлэх бүхий л арга хэмжээг авч, хатуу хяналт тавьж ажиллах /хоол үйлдвэрлэл үйлчилгээний газрыг 2021 оны зургаадугаар сарын 17-ны өдрөөс эхлэн 7 хоногийн хугацаатай заалаар үйлчлэхийг хориглох, амралт, жуулчны баазын үйл ажиллагааг зургаадугаар сарын 17-ны өдрөөс эхлэн 7 хоногийн хугацаанд үйл ажиллагааг нь хязгаарлах\,

Арав. Өмнөговь болон Дорноговь аймаг руу зорчих иргэдийн хөдөлгөөнд 2021 оны зургаадугаар сарын 15-ны өдрийн 06 цагаас эхлэн зургаадугаар сарын 30-ны өдөр хүртэлх хугацаанд хязгаарлалт тогтоож, төрийн байгууллагын албан томилолтоор зорчих иргэдийн зөвшөөрлийг УОК-ын Шуурхай штабаас, бусад шаардлагаар зорчих иргэдийн зөвшөөрлийг ямар ч тохиолдолд коронавируст халдварын шинжилгээний сөрөг хариунд үндэслэн тухайн аймгийн Онцгой комисоос олгох, 

Арваннэг. Экспортын үйл ажиллагааг эрчимжүүлэх, удирдлага зохион байгуулалтаар хангах, шаарлагатай хязгаарлалтын арга хэмжээг авч хэрэгжүүлэх зорилгоор Дорноговь, Өмнөговь аймгуудад Батлан хамгаалахын сайдаар ахлуулсан шуурхай бүлэг томилж ажиллуулах,

Арванхоёр. Коронавируст халдварын цар тахлаас урьдчилан сэргийлэх, тэмцэх, нийгэм, эдийн засэгт үзүүлэх сөрөг нөлөөллийг бууруулах тухай хуулийн үйлчлэх хугацааг сунгах, нэмэлт өөрчлөлтийн төсөлд яамдаас санал авч нэгтгэн Засгийн газрын хуралдаанд танилцуулах шийдвэр гаргасан байна. 

Б.Баатар