Сангийн сайд Б.Жавхлан эдийн засгийн нөхцөл байдлын талаар мэдээлэл өглөө.

Тэрбээр “Өнөөдрийн Засгийн газрын хуралдаанаар эдийн засгийн өнөгийн нөхцөл байдал, төсвийн гүйцэтгэлийн талаар хэлэлцлээ. Тухайлбал, энэ оны тавдугаар сарын 31-ний өдрийн байдлаар төсвийн орлого 98 хувийн гүйцэтгэлтэй гарсан. Энэ нь өнөөгийн нөхцөл байдалд чамлахааргүй тоо. Төсвийн орлогыг өнгөрсөн оны мөн үетэй харьцуулахад сайн нэмэгдсэнээс гадна 2019 оны гүйцэтгэлээс давж гарсан. Өөрөөр хэлбэл, эдийн засгийн нөхцөл байдал Засгийн газраас авч хэрэгжүүлсэн арга хэмжээнүүдийн үр дүнд 2019 оны суурь гүйцэтгэл зарим үзүүлэлт давж ирсэн.

Үүнд экспортын түүхий эдийн ханш энэ жилийн төсөв дээр тэнцвэржүүлсэн үнийн төсөөллөөс харьцангуй таатай байсан нь нөлөөллөө.

Энэ жил хамгийн гол үр дүнг өгсөн сайн үзүүлэлт нь урт хугацааны сунжирсан хатуу хөл хориог барилгүй шат шатанд нь тодорхой хэмжээнд нээлттэй байсны үр дүнд эерэг гарч байна. Оны эхний тавдугаар сарын байдлаар и-баримтад тайлагнасан борлуулалтын дүн 39.5 их наяд төгрөг байна. Энэ нь өнгөрсөн оны мөн үеэс даруй 25 хувь, 2019 онтой харьцуулбал 4 их наядын өсөлттэй байна.

Бүхий л салбаруудын үзүүлэлт өсөлттэй гарсан. Үүнээс үзвэл эдийн засаг сэргэх нааштай үр дүн гарч байна.

Энэ нь Засгийн газраас хэрэгжүүлсэн “Эдийн засгаа сэргээж, эрүүл мэндээ хамгаалах 10 их наядын цогц төлөвлөгөө”-ний хүрээнд гарсан, ялангуяа гурван төрлийн зээл эдийн засаг эерэг гарахад нөлөөлсөн. Хэрэв 10 их наядын цогц төлөвлөгөөний хүрээнд 2.4 их наядын зээл гараагүй бол банкуудын зээл бууралттай гарах байсан" гэлээ.

Б.Лхам