УИХ-ын чуулганы хуралдаанаар Монгол Улсын хөгжлийн 2022 оны төлөвлөгөө батлах тухай” Улсын Их Хурлын тогтоолын төслийг хэлэлцэж байна.

Д.Ганбат: Юун хөгжлийн төлөвлөгөө вэ. 2022 онд та нар хөгжинө гэж бодоод байгаа юм уу. 2020, 2021 онд ямар байлаа. Та нарын өмнөөс үнэхээр ичиж байна. Энэ Засгийн газар Монгол Улсын 100 жилийн түүхэнд хамгийн эрх мэдэлтэй, хүчтэй Засгийн газар. Гэтэл та нарын хийж, хэрэгжүүлж байгаа ажил ямар байна. 2021 оны нөхцөл байдал ямар  байснаа ярьж байж 2022 оныхоо ярина. Бид өнөөдөр маскгүй, ярьж хэлэлцэж байх минут нь таван минут байх ёстой. Үнэхээр арчаагүй байна.

Сайн сайн Засгийн газрууд байсан. Тухайлбал, М.Энхсайхан, Н.Алтанхуяг, Сү.Батболдын Засгийн газар байна. Юм хийж байсан. Эдийн засгийг түүхэнд байхгүйгээр хөгжүүлж байсан.

Нэг хүнд ногдох ДНБ 4200 ам.доллар байна. 2022 он гэхэд яг хэдэн ам.доллараар нэмэгдэх юм. Улаанбаатарын түгжрэл, яндан хэдээр буурах юм. Хамгийн наад зах нь Дарханы зам чинь хэзээ нээх юм. Гайхаад байдаг юм. Яагаад Сэлэнгэ, Дарханыхан МАН-ыг дэмжээд байдгийг. Иргэд ч хариуцлагатай байх ёстой.

Зам тээврийн хөгжлийн сайд Л.Халтар: Улсын хэмжээнд сүүлийн гурван жил гарч байгаа авто замын ослыг Дарханы зам дээр нааж, улс төр хийж байгаа асуудал бий. Тиймээс Тээврийн цагдаагийн газраас яг албан ёсны тоо мэдээллийг нь аваад тань руу явуулъя. Дарханы замыг гэрээ ёсоор 2022 оны аравдугаар сард ашиглалтад оруулна. Гэхдээ зарим гарч байгаа хүндрэлүүд бий.

Б.Лхам