Ерөнхийлөгчийн сонгууль өнгөрлөө. Энд тэндхийн албан тушаалуудад сэлгээ хийгдэх яриа өндөлзөөд эхэллээ. Тэдгээрийн тэргүүнд "Эрдэнэт үйлдвэр" байна. Тус үйлдвэрийн захирал Х.Бадамсүрэн Ерөнхийлөгчийн сонгуулийн дараа ажлаа өгнө гээд аль эрт тохирсон гэдэг. Тэгэхдээ Ардын хувьсгалын 100 жилээр шинэ Ерөнхийлөгчөөс "Хөдөлмөрийн баатар" цолоо авчихаад явна гэсэн юм даг уу даа. Тийм мэдээлэл бас бий. Х.Бадамсүрэн ямар ч байсан явна. Оронд нь хэн очих вэ гэдэг “дээгүүр” нэлээд яригдаж байна. Олон хүний нэр дуулдаж байна.

Гэхдээ “Эрдэнэт үйлдвэр”-ийн шинэ ерөнхий захиралтай зэрэгцээд одоогийн санхүү хариуцсан орлогч Д.Үүрийнтуяагийн талаар улс амьтан ихэд сонирхох юм. “Х.Бадамсүрэнг "Баатар"-аа аваад явчихаар Д.Үүрийнтуяа хаачих вэ” гэцгээж байна. Х.Бадамсүрэн Д.Үүрийнтуяа хоёр тун ойр гэнэ.

Хамтран ажилладаг хүмүүс ойр л байж таарна. Тэгэх ч ёстой. Тэгсэн ч Х.Бадамсүрэн нь Д.Үүрийнтуяадаа хэнээс ч илүү итгэдэг гэх... Тийм учраас Х.Бадамсүрэнг явахаар Д.Үүрийнтуяа тэндээ байх уу үгүй юу гэдгийг хүмүүс сонирхоод байгаа хэрэг бололтой. Гэвч тэр энэ ажилдаа хэвээр үлдэхгүй л болов уу. Хэн ч ерөнхий захирлаар очсон, Д.Үүрийнтуяаг Х.Бадамсүрэн шиг эрхлүүлэхгүй нь тодорхой юм. Нөгөө талаас Д.Үүрийнтуяа их амбийцтай. Таван сарын өмнө Х.Бадамсүрэнг өргөдлөө өгч, Д.Үүрийнтуяа оронд нь очих гэж байна гэсэн мэдээ зарим сайтад нийтлэгдэж байв. Энэ мэдээ ортой оргүй нь тодорхойгүй үлдсэн. Харамсалтай нь ортой байсан ч Д.Үүрийнтуяа ерөнхий захирал болох боломжгүй болчихсон. Түүний мотор гэгддэг Ц.Анандбазар өөрийгөө яая гэхээр болсон. Тэгэхээр Д.Үүрийнтуяа Х.Бадамсүрэнтэй л хамт явж таарах гээд байгаа юм. Харин араасаа чангаалгах хууль бус худалдан авалтын ажилд багахан шиг орооцолдсон байгаасай даа.

С.Сүлд