Коронавирусний халдвар хэдийнэ цар тахал болж, 10 мянга орчим хүн эл халдвараар өвчилж, 500 орчим эрдэнэт хүний алтан амь эрсдээд байна. Зургаадугаар сарын 15-ны өдөр гэхэд дархлаажуулалтыг бүрэн хийж, халдварын тоо буурна хэмээн албаныхан үзэж, тооцолж байсан ч нөхцөл байдал эсэргээрээ болж, халдварын тоо өдөр ирэх тусам нэмэгдэх болов.
Үүний шалтгааныг салбар яам нь судалж байна, дархлаажуулалтдаа хамрагдаагүй иргэд олон байна, ард иргэд халдвар хамгааллын дэглэмээ баримтлахгүй байна гэх мэтээр бүхий л бурууг ард түмэн рүүгээ чиглүүлж, чичилж сууна.
Мөн салбарын сайд нь халдвар авсан иргэдэд 70 мянган төгрөгийн эм бэлдмэл олгож байгаа, бид чадлынхаа хэрээр зүтгэж байна гэх зүйлийг ярьж, шууд нэвтрүүлгийн үеэр иргэдээс хатуухан "банга" хүртсэн. Үнэндээ нөхцөл байдал бодит амьдрал дээр С.Энхболд сайдын хэлдэг шиг байхгүй байна. Тодруулбал, халдвар авч гэрээр тусгаарлагдан эмчлэгдэж буй иргэдэд эрүүл мэндийн үйлчилгээ, тэр дундаа сайдын хэлж буй 70 мянган төгрөгийн багц огт хүрээгүй гэж хэлэхэд ч нэг их хилсдэхгүй биз.
Үндсэн хуулиар олгогдсон эрүүл, аюулгүй орчинд амьдрах эрх нь зөрчигдөж, эрүүл мэндийн тусламж үйлчилгээг бүрэн авч чадахгүй байгаа иргэд өнөөдөр үхэхгүйн тулд хаданд гарсан коронавирусний эм, бэлдмэлийг өндөр үнээр худалдан авч байна.
Гэтэл үүнд салбарын яам нь дорвитой санаа тавьж байгаа зүйл алга. Харин Үндэсний аудитын газар өнгөрсөн долоо хоногт ЭМЯ болон Эм, эмнэлгийн хэрэгслийн хяналт, зохицуулалтын газрын 2021 оны вирусийн эсрэг эмийн худалдан авалтад бодит цагийн аудит хийж, бүхнийг илчилж, Эрүүл мэндийн яаманд зөвлөмж хүргүүлсэн байдаг.
Тодотговол, Эм, эмнэлгийн хэрэгслийн тухай хуулийн 4 дүгээр зүйлийн 4.5, 6 дугаар зүйлийн 6.1, 6.2.9-д заасны дагуу зайлшгүй шаардлагатай эмийн жагсаалтад оруулан баталсан эмийн үнэд төрөөс зохицуулалт хийх боломжтой байдаг тул цаг үеийн нөхцөл байдлаас шалтгаалан вирусийн эсрэг эм, тарилгын эмийн мэдээллийг тус жагсаалтад оруулан, эм ханган нийлүүлэх байгууллага, эмийн сангуудаар зарагдаж байгаа эмийн үнэ хэт өндөр байхаас сэргийлж үнийн зохицуулалт хийх,
Эрүүл мэндийн даатгалын тухай хуулийн 14 дүгээр зүйлийн 14.9.10-т заасны дагуу Эрүүл мэндийн даатгалын үндэсний зөвлөл хөнгөлөлттэй эмийн жагсаалтыг баталдаг. Тус хуулийн 9 дүгээр зүйлийн 9.3-т зааснаар даатгуулагч эрүүл мэндийн даатгалын сангаас хөнгөлөлт олгох зайлшгүй шаардлагатай эмийн жагсаалтад батлагдсан эмийг эмийн сангаас хөнгөлөлттэй үнээр худалдан авах зохицуулалттай. Тиймээс коронавируст халдварын эмчилгээнд хэрэглэж буй вирусийн эсрэг эмийг тус жагсаалтад оруулах, иргэдэд үнийн хөнгөлөлт үзүүлэх нөхцөлийг судлах зөвлөмжийг өгсөн.
Салбарын яам нь санаачлаад хийж чадаагүй ажлыг хийх хэрэгжүүлэх зөвлөмжийг мэргэжлийн байгууллага ийнхүү өгөв. Харин үүнийг ажил хэрэг болгож, халдвар авч, эмнэлгийн тусламж үйлчилгээ авч чадахгүй, эмийн компаниудад "шулуулж" буй ард түмнээ анхаарах цаг болжээ С.Энхболд сайд аа.
Б.Баатар
