Дараагийн Ерөнхийлөгч тангараг өргөснөөр Ерөнхийлөгчийн бүрэн эрхийн хугацаа дуусгавар болдог. Энэ хүрээнд ирэх баасан гарагийн морин цагт одоогийн Ерөнхийлөгч Х.Баттулгын бүрэн эрхийн хугацаа дуусна. Тэгвэл Хууль зүй, дотоод хэргийн яамнаас болвсруулсан Ерөнхийлөгчийн тухай хуулийн шинэчилсэн найруулгын төсөлд Х.Баттулга Ерөнхийлөгчийн эрхийг хязгаарлах, улстөрд дахин ирэхэд нь хаалт хийсэн заалтууд гэж үзэж байгаа юм. Үүнд,

• Ерөнхийлөгч бүрэн эрхийнхээ хугацааг дууссан өдрөөс эхлэн таван жилийн хугацаанд улс төрийн намын гишүүнчлэлээ сэргээх, эсхүл улс төрийн нам байгуулах, эсхүл улс төрийн намын гишүүнээр элсэхийг хориглоно.
• Ерөнхийлөгч байсан иргэн гадаад улсад эмчлүүлэхээс бусад тохиолдолд гадаад улсад байнга оршин суух, амьдрахыг хориглоно.
• Ерөнхийлөгч байсан иргэн гадаадын хөрөнгө оруулалттай хуулийн этгээдэд удирдах болон гүйцэтгэх албан тушаал, зөвлөх үйлчилгээ үзүүлэхийг хориглоно.
• Ерөнхийлөгч байсан иргэн Монгол Улсын харьяатаас гарч, гадаад улсын харьяат болохыг хориглоно.

• Ерөнхийлөгч бүрэн эрхийнхээ хугацааг дууссанаас эхлэн Засгийн газрын гишүүний тухайн үеийн цалинтай тэнцэх цалин насан турш авна.
• Ерөнхийлөгч бүрэн эрхийнхээ хугацааг дууссан өдрөөс эхлэн гурван жилийн хугацаанд суудлын автомашин болон холбоогоор үйлчлүүлж, гуравдугаар зэрэглэлийн төрийн тусгай хамгаалалтад байх бөгөөд энэ талаар тусгайлан шийдвэр гаргахгүй.
• Ерөнхийлөгч байсан иргэн энэ хуулийн 23 дугаар зүйлд заасан Ерөнхийлөгчийн бүрэн эрх дуусгавар болсны дараахь хязгаарлалтыг зөрчсөн бол түүнд энэ хуулийн 24.1-д заасан цалин олгохыг зогсооно гэж хуулийн төсөлд тусгажээ.