Монгол Улсын Ерөнхийлөгч Х.Баттулга гурав хоногийн дараа Төрийн тэргүүний сэнтийгээс бууж, өндөр албан тушаал хаших эрх нь дуусгавар болно. Өнгөрсөн хугацаанд тэрбээр ганц дайчин ганцаардахгүйн жишгээр сөрөг хүчний эсрэг хэсэг үзэлцэж, АН-аа ч хагалан бутаргаж, хууль, шүүхийн шинэчлэлд хориг тавьж, үймээн самуун дэгдээхээр турхирч хэсэгтээ манаргаж байсан бол сэнтийгээсээ буух дөхөхөөр олон хүнд буян болж, зургаадугаар сард гэхэд л 18000 мянган хүнд одон, медалийг харамгүй гардуулсан байдаг. Түүний энэ л сүүлчийн дүр төрх олон хүний сэтгэлд үлдэж, нөгөөтэйгүүр, цар тахлыг нэмэгдүүлэх шалтгаан болсон хэмээн зэмлүүлж сууна.
Гэвч Ерөнхийлөгч Х.Баттулга сайнаар дурсагдах сайн үйлийг хийсэн. Тэрбээр Монгол Улсын Үндсэн хуулийн 33 зүйлийн нэг дэх хэсгийн 8 дахь заалт, Монгол Улсын Ерөнхийлөгчийн тухай хуулийн 15 дугаар зүйлийн 15.2, Эрүүгийн хуулийн 6.14 дүгээр зүйлийн нэг дэх хэсгийг тус тус үндэслэн зарлиг гаргаж, Олон улсын эмэгтэйчүүдийн эрхийг хамгаалах өдрийг тохиолдуулан ял эдэлж байсан нярай болон олон хүүхэдтэй анх удаа хөнгөн гэмт хэрэг үйлдсэн 21 ээжид, гуравдугаар сарын 22-ны Наурызын баярыг тохиолдуулан зурагт, зуух, гар утас хулгайлж, анх удаа хөнгөн гэмт хэрэг үйлдсэн нэр бүхий казах иргэдэд өршөөл үзүүлсэн юм. Тодруулбал, хорих ангиудад ял эдэлж байсан нийт 31 иргэнд уучлал үзүүлж, эдлээгүй үлдсэн хорих ялаас бүрэн чөлөөлсөн билээ. Казак иргэдэд өршөөл үзүүлсний дотор УИХ-ын гишүүн асан Г.Солтан ч багтсан юм.
Харин Ерөнхийлөгч маань сэнтийгээсээ буухын өмнө өр зөөлөн дүрийг дахин үлдээхийн тулд өдгөө ял эдэлж байгаа, төрийн өндөр албан тушаал хашиж байсан эрхмүүдэд “Би чамайг уучилсан зарлиг гаргая. Буруугаа хүлээгээд хүсэлтээ өгчих” хэмээн гувшиж суугаа сурагтай. Харин нөгөөдүүл нь хилсээр оноосон ялыг чинь эдлээд гарна хэмээн шийр зааж байгаа тухай хуулийнхан ам дамжин ярьсаар байна.
Үнэндээ Х.Баттулгыг Төрийн ордны гуравдугаар давхарт ирсэн шүүгчдэд хэргийн эзэнд хэдэн жилийн ял оноохыг хэлдэг, “хонгил”-ын шүүгчдээр дамжуулан дуулиант хэргийн шүүгдэгчдийн хувь заяаг эртнээс шийддэг схем ч ил болж, түүний эрх мэдэлд байдаг шүүгчид нь авлигад идэгдсэнийг өнгөрсөн хугацаанд бид хангалттай харлаа. Түүний бүрэн эрхийн хугацаанд экс Ерөнхий сайдаасаа эхлүүлээд төрийн өндөр дээд албан тушаал хашиж байсан олон хүн шоронгийн хаалга татаж, ял сонссон. Буруутай нь бий л байх, бас хилсээр орсон нь бий л байх. “Хонгил”-ын шүүгч, өмгөөлөгч гэх нэр томъёог нийгэмд дэлгэрүүлсэн тэрбээр Төрийн сэнтийгээсээ буусны дараа чухам юугаар дурсагдах бол.”Хонгил”-ын Ерөнхийлөгч үү...
У.Тэргэл
Сэтгэгдэл (24)