Жил бүрийн есдүгээр сарын 27-нд дэлхийн аялал жуулчлалын өдөр тохиодог билээ. Энэ хүрээнд нийслэлийн Аялал жуулчлалын газраас жил бүр олон янзын арга хэмжээ зохион байгуулж ирсэн уламжлалтай. Тэгвэл энэ жилийн хувьд НЗДТГ, нийслэлийн Аялал жуулчлалын газар, МҮХАҮТ хамтран “Үнэгүйдсэн Монгол брэнд буюу гар урчуудын ганцаардал” сэдэвт нээлттэй хэлэлцүүлгийг зохион байгууллаа. “Монголд үйлдвэрлэв” шошготой бүтээгдэхүүний тодорхой хувийг гар урчуудын бүтээл эзэлж байна. Тэдний үйлдвэрлэсэн эсгий, арьс ширэн бүтээгдэхүүн гадаад, дотоодын аялал жуулчлалын салбарын салшгүй нэг хэсэг болсон ч тэдэнд тулгамдсан асуудал байсаар байгаа юм.  Тиймээс ч тэдэнд тулгамдаж буй асуудлыг шийдвэрлэх зорилгоор энэхүү хэлэлцүүлгийг зохион байгуулсан аж. Энэ үеэр гар урчууд ажлын байр, хүний нөөц, мэргэшсэн боловсон хүчин, гаалийн татвар, гадаад, дотоод зах зээл зэрэг тулгамдаж буй асуудлын талаар хэлэлцсэн юм. Мөн МҮХАҮТ-ын зүгээс тэдэнтэй хамтарч ажиллаж, асуудлыг шийдвэрлэх гарц олохоо амласан.