УИХ-ын дарга Г.Занданшатар хэдхэн хоногийн өмнө цахим сүлжээндээ нэгэн пост оруулсан нь олны шүүмжлэл дагуулсан. Тодруулбал, тэрбээр "Тэд ч бас гэр бүл, үр хүүхэд, хань ижилтэй. Цар тахлын нөхцөлд хамгийн их ажиллаж буй хүмүүс бол эмч, сувилагч, эмнэлгийн ажилтнууд маань билээ.

Хайртай бүхнээсээ хол хэдэн хоног, сараар хүний төлөө өргөсөн тангаргаасаа үл няцан хөдөлмөрлөж буй та бүхэндээ талархъя. Цар тахлыг ялж, та бүхний минь нуруу тэнийж, хэвийн ажил, амьдралдаа хурдан орох цаг удахгүй биз ээ. Иргэн та бид эмч нарынхаа ачаалалд ачаалал нэмэхгүйн тулд хариуцлагатай, ухамсартай байцгаая. Тэд ч бас гэр рүүгээ яарч байгаа" хэмээн бичиж, нэгэн зурагт гарын үсэг зурж, өөрийн цахим хуудсаараа дамжуулан олон нийтэд түгээсэн билээ.  

Гэтэл УИХ-ын даргын постын зураг нь дэлхийд алдартай Тhe New Yorker сэтгүүлийн 2020 оны дөрөвдүгээр сарын 6-ны өдрийн нүүр зураг байжээ. Оюуны өмчийг хулгайлсан УИХ-ын дарга Г.Занданшатарын энэхүү үйлдэл олны шүүмжлэл дагуулсан учир тэрбээр уг постоо устгасан байна.

Төрийн гурван өндөрлөгийн нэг тэрбээр алдарт сэтгүүлийн нүүр зургийг ашиглаж, "попорсон" нь оюуны өмчийг уландаа гишгэснээс өөрцгүй юм. Оюуны өмчийн асуудлыг ихээр хөндөх болсон энэ цаг үед УИХ-ын даргаасаа эхлээд энэ мэтээр хулгай хийж, шившиг болдог явдлыг халж, оюуны өмчид хүндэтгэлтэй хандаж сурцгаая.

Б.Баатар