УИХ-ын гишүүдтэй холбоотой элдэв мэдээлэл үе, үе гарч, дуулиан тарьдаг. Гэсэн ч асуудал өндрийг авахгүй тэгсхийгээд намждаг жишиг тогтож байх шиг. Сүүлийн үед парламентын гишүүд дуу дуугаа авалцан асуудалд орох боллоо. Тодотговол, УИХ-ын гишүүн Ц.Анандбазар охид эмэгтэйчүүдийг хүчирхийлдэг тухай мэдээлэл газар авч, түүнийг МАН-ын гишүүнчлэлээс нь түдгэлзүүлэх шийдвэр гаргасан.
Энэ дуулиан намжиж амжаагүй байтал УИХ-ын гишүүн Б.Пүрэвдорж согтуугаар тээврийн хэрэгсэл жолоодож яваад ноцтой осол гаргаж, олныг сэрдхийлгэсэн. Тэгвэл хэдхэн хоногийн өмнө УИХ-ын гишүүн Ж.Мөнхбат гэр бүлийн хүчирхийлэл үйлдэж, эхнэртээ гар хүрсэн гэх мэдээлэл олон нийтэд ил боллоо.
Гэсэн ч УИХ-ын ёс зүйн хороо эдгээр гишүүдийн талаар хэлэлцэх нь бүү хэл "ам ч ангайсангүй". Гишүүд ч уучлалт гуйж, буруугаа хүлээсэнгүй өнөөдрийг хүрэв. Үнэхээр тэд уучлалт гуйх хэмжээнд өндрийг аваагүй юу.
Ц.Анандбазар гишүүн охид эмэгтэйчүүдэд бэлгийн дарамт үзүүлсэн байж болзошгүй гэх хэрэгт холбогдов
Иргэн Б.Сүндэръяа буюу Сүнээ энэ асуудлыг олон нийтэд ил болгосон. Тэрбээр цахим хуудсаараа дамжуулан удаа дараа нэгэн гишүүн өөрт нь бэлгийн дарамт үзүүлэхийг оролдсон. Тэр ч бүү хэл амь насанд нь заналхийлж байгаа талаар мэдээлсэн. Эцэст нь дөрөвдүгээр сарын 14-ны өдөр Цагдаагийн ерөнхий газарт хүчирхийллийн асуудлаар гомдол гаргасан юм.
Энэ талаар иргэн Б.Сүндэръяа "Ц.Анандбазар гишүүнтэй 2019 онд танилцаж байсан. Танилцах хүсэлтийг манай найзаар дамжуулан олон удаа тавьж байсан ч тэр болгонд нь татгалзаж байсан. Танилцах шалтгаан байсан юм билээ. Түүнийг нь одоогоор олон нийтэд хэлэх боломжгүй байна. Өргөдөл гомдолдоо тусгасан. Ц.Анандбазар гишүүний асуудлаар 1000 гаруй охин холбогдсон. Ийм асуудал болно гэж тооцоолоогүй. 2020 оны УИХ-ын сонгуулиар намайг ямар ч хамаагүй хүнтэй холбож, бичлэг эвлүүлж хийсэн. Миний хувьд нандин нууцаараа Ц.Анандбазар гишүүнд барьцаалагдсан. Насаараа ингэж дарамтлуулж чадахгүй. Энэ хүн төрийн өндөр албан тушаалтан, тэрбумтан хүн. Энэ хүнийг би дийлэхгүй болохоор өргөдөл гомдол гаргаж чадахгүй байсан. Бүх нотлох баримт надад байгаа" гэсэн юм.
Мөн түүний өмгөөлөгч Н.Батсүх "Манай үйлчлүүлэгчийн эрүүл мэнд, амь нас, бэлгийн халдашгүй байдлын эрх зөрчигдсөн. Үүнд Ц.Анандбазар гишүүн холбоотой. Тиймээс гурван асуудал дээр гомдол гаргасан. Тухайлбал, Эрүүгийн хуулийн тусгай ангийн 11 дүгаар бүлэгт заасан эрүүл мэндийн халдашгүй байдалд халдсан, 12 дугаар бүлэгт заасан бэлгийн халдашгүй байдалд халдан довтолсон, 13 дугаар зүйлд зааснаар өөрт болон бусад хүнд заналхийлэл учруулсан зэрэг асуудлаар гомдол гаргаж байгаа. Энэ гомдол нь зөвхөн Б.Сүндэръяагийн асуудал биш. Үүний цаана олон охидын асуудал байгаа болохоор хууль шүүхийн байгууллага үнэн зөвөөр шийдэж өгнө гэж найдаж байна" гэдгийг олон нийтэд мэдээлсэн.
Б.Пүрэвдорж гишүүн өндөр хэмжээний согтолттой "нислэг" хийв
Дөрөвдүгээр сарын 18-ны шөнө 00.40 цагийн орчимд Хан-Уул дүүргийн II хороонд байрлах "АПУ" ХК-ийн хойд уулзварт 63-..УНЦ улсын дугаартай, хар өнгийн "Ниссан теана" автомашин зам тээврийн ноцтой осол гаргасан. Уг автомашиныг УИХ-ын гишүүн Б.Пүрэвдорж жолоодож, ганцаараа зорчиж явсан бөгөөд өндөр хэмжээний согтолттой байсан юм. Түүний хамар, завжнаас цус гарснаас өөрөөр ноцтой гэмтэл байгаагүй талаар тухайн үед эх сурвалж мэдээлж байв.
Тэрбээр 67-..УНЦ дугаартай "Тоёота приус-20" автомашиныг шүргээд, замын хашлага давж, явган хүний зам руу орж, хашаа мөргөн зогссон байна. Автомашины хаалга онгойхгүй байснаас зам дээр үүрэг гүйцэтгэж байсан цагдаагийн хоёр алба хаагч машины шилийг нь хагалж, Б.Пүрэвдоржийг гаргасан байдаг. Ослын дараа автомашин урд хэсгээсээ шатаж эхэлсэн бөгөөд Онцгой байдлын байгууллага руу дуудлага өгч, гал унтраах ангийн алба хаагчид шуурхай ажилласнаар галыг унтраан, аюулгүй болгосон юм.
Энэ бүхний дараа Б.Пүрэвдорж гишүүн өөрийн цахим хаягаараа дамжуулан иргэдээсээ уучлалт хүссэн. Тэрбээр “Би хариуцлагагүй үйлдэл хийж, зам тээврийн осол гаргасандаа иргэдээсээ уучлал гуйж байна. Хашлага саад гэмтээсний төлбөр төлж, жолоодох эрхээ хасуулж, торгууллаа. Мөн автомашины торгуулиа бүгдийг төлсөн. Цагдаа, эмч, онцгойгийнхонд баярлалаа. Одоогоор бие жаахан тийм тул эмчийн хяналтад байгаа. Дахин ийм үйлдэл хийхгүй” гэв.
УИХ-ын гишүүн Ж.Мөнхбатыг эхнэрээ зодсон гэдгийг хадам ээж нь "илчлэв"
УИХ-ын гишүүн Ж.Мөнхбат эхнэрээ зодсон гэх мэдээлэл энэ сарын 17-ны өглөө цахим мэдээллийн сувгуудаар олон нийтэд ил болов. Тодруулбал, хүүхдийн тусламжийн 108 дугаарт “Хан-Уул дүүргийн VIII хорооны нутаг дахь “Жаргалант” хотхонд иргэн Ж.Мөнхбат эхнэрээ зодоод байна гэсэн мэдээлэл үүрийн 04.00 цагийн үед ирсэн байна. Энэ дагуу Хан-Уул дүүрэг дэх Цагдаагийн газрын хоёрдугаар хэлтсийн алба хаагчид тухайн хаягт очиж шалгахад УИХ-ын гишүүн Ж.Мөнхбат согтууруулах ундаа хэрэглэсэн үедээ эхнэр, 36 настай Д.Б-ыг машинаасаа түлхэж унагаан орхиж явсан байсан аж.
Энэ талаар УИХ-ын гишүүн Ж.Мөнхбат “Манайх “Жаргалан” хотхонд амьдардаггүй. Би эхнэрээ зодож, гэр бүлийн хүчирхийлэл үйлдээгүй” хэмээж байв.
Харин түүний хадам ээж Д.Цэцгээ өөрийн цахим хаягаар дамжуулан мэдээлэл түгээсэн юм. Тэрбээр "УИХ-ын гишүүн Жамъянгийн Мөнхбат эхнэр, гурван нялх хүүхдийнх нь ээж, миний амин хайртай охин Б-г удаа дараа зоддог нь үнэн боллоо. Охин минь гурван хүүхдээ бодоод аав, ээж, ах, эгч, нартаа ч хэлээгүй шаналж явсныг нь би мэдээгүйдээ харамсаад баршгүй. Хаалгаа цөм өшиглөж эвдсэн, одоо ч хаалганууд нь эвдэрхий хэвээрээ байгаа. Одоо би охиноо эцсийн амьсгалаа хураатал тэмцэн, өмгөөлж хамгаална. Хайртай шүү охиндоо" хэмээв.
Цагдаагийн байгууллагаас УИХ-ын гишүүн Ж.Мөнхбатын эл үйлдлийг шалган Эрүүгийн хуулийн 11.7-д заасан гэр бүлийн хүчирхийлэл үйлдсэн гэмт хэргийн шинжтэй эсэхийг нягтлаж байгаа юм. Эл хэргийг зөрчлийн шинжтэй үйлдэл гэж үзвэл Зөрчлийн тухай хуулийн 5.4 дэх хэсэгт заасан үндэслэлээр хариуцлага тооцож болзошгүй юм.
Б.Баатар
Сэтгэгдэл (10)