Т.Мөнхсайхан Эрүүл мэндийн сайдаар ажиллаж байхдаа салбарынхаа идээ бээрийг цэвэрлэж, шинэчлэлийг зоригтой эхлүүлж чадсан хэмээн олны хүндэтгэлийг хүлээгээд буй ч түүний удирддаг Хүчитшонхор зах мөнхийн асуудалтай. Тухайлбал, саяхан тус газар Нийслэлийн мэргэжлийн хяналтын газраас хяналт шалгалт оржээ. Шалгалтаар худалдаа эрхлэгчдийн ажлын байрны багаж, тоног төхөөрөмж хэрэгсэл, хутга, өлгүүр, халат, жин хэмжүүр, ширээ тавцангийн тавиур, махны машины гол хөргөгч, хөлдөөгчний дотор талын булан, тавиурны хэсгүүдэд 80 арчдасны шинжилгээ түүврээр авахад 62-т нь хүний гэдсэнд байдаг нян бөгөөд өтгөнөөр дамжиж гадагшладаг, халдварт өвчин тараах эрсдэлтэй enterbacter spp, esherichia coli гэдэг хоёр нян илэрчээ.

Уг нь эрүүл мэндийн салбарын хүнээр удирдуулдаг талаас нь авч үзвэл ядаж чанар, стандарт талаасаа аюулгүй баймаар. Т.Мөнхсайханы мэргэжлийн ур чадвартай нь бол маргах хүн үгүй. Гэвч өөрөө хүнийг эмчилдэг, удирддаг компани нь иргэдийг хохироодог байж болох уу. 

Хүчитшонхор бол түм түжигнэж, заримынх нь амьжиргааны эх үүсвэр болсон газар. Бүр болоогүй махны үнэд монополь ч чанар, эрүүл ахуй талаасаа "нойл".  

Иргэдэд чанаргүй бүтээгдэхүүнээр үйлчилдэг, түүгээр ч барахгүй зөвшөөрөлгүй тоглоомын үйл ажиллагаа явуулж хууль зөрчинө. Жин хэмжүүр нь тохирлын гэрчилгээгүй даварсан газар гэхэд болно. Ийм газрын толгойг илж, иргэдийг эрүүл мэндээр нь хохироосоор байх уу.

А.Сүх