УИХ-ын чуулганаар “Ковид-19”-ийн цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийг хэлэлцэж байна. Хуралдаанаар Эрүүл мэндийн сайд С.Энхболд ковидын халдвартай өвчтөнүүдэд зарцуулагдах шинэчилсэн төсвийн талаар мэдээллээ.

Тэрбээр "Анх баталсан 8 сая төгрөг нь 28 хоногийн  эрчимт эмчилгээний ор хоногийн тооцоолол юм. Эмнэлзүйн шинж тэмдгээс шалтгаалан тохируулсан үнийн тарифыг батлуулсан. Харин одоо өвчтөний биеийн байдал хөнгөн бол нэг сая 50 мянга, хүндэвтэр бол 3.5 сая төгрөг гэх ангиллыг гаргаж, батлуулсан. Үүнд дахин нэмэлт өөрчлөлт оруулан, эмийн зардлыг шинэчилж, өмнө нь маш хүнд өвчтөн 4,3 сая төгрөгөөр эмчлүүлж байсан бол одоо шинэ тарифаар 7,7 сая төгрөг болж шинэчилсэн. Үүнд эм, эмнэлгийн хэрэгсэл, эрчимт эмчилгээний зардал, эмч ажилчдын цалин бүгд багтсан байгаа.

Улсын хэмжээнд өнөөдрийн байдлаар 27 мянган ор бий. Үүний 11 мянгыг зөвхөн Ковидод зориулж, дэлгээд байна. Бид ор хэдийг ч дэлгэж болох ч хамгийн  гол нь хүний нөөц дутагдаад байна.

Монгол Улсад эрчимт эмчилгээний 340 эмч, нийт сувилагч 13 мянга, эмч 11 мянга гээд эмнэлгийн нийт 57 мянган ажилтан бий. Тэд үнэхээр туйлдаж, нөхцөл байдал хүндэрч байгаа. Манайд амьсгалын эсмо аппарат гурав бий, дахин нэгийг авч ирж байна. Аппаратад ороход нэг хүнд 35 сая төгрөг зарцуулдаг" гэлээ.

У.Тэргэл