Нэг бүдэрвэл долоо бүдрэхийн жишээг Соёлын сайд Ч.Номин утгаараа харуулж байна. Бохирч сууж, унаж тусан байж гишүүнийхээ тангаргыг өргөсөн эрхэм сайдтан хөлд, хэлд ороогүй гэдгээ өдгөө ч мэдрүүлсээр сууна.

УИХ-ын чуулганы өчигдрийн хуралдаанаар Соёлын тухай хуулийн эцсийн хэлэлцүүлгийг хийх үеэр УИХ-ын дарга Г.Занданшатар үндэсний баяр наадмыг ямар учраас хийх ёстойг Соёлын сайд Ч.Номингоос асуув.

Харин Ч.Номин сайд “Наадам бол Монгол Улсын төрт ёсны өв юм. Бидний оюун санааны дархлаа бөгөөд цаашдын тулгар төрийн гол агуулга байгаа. Энэ утгаараа хүн бүрийн хадгалж, өвөлж, үр хүүхэддээ таниулан, түгээж байх ёстой. Нүүдэлчин соёл агуулгаараа шингэсэн байдаг. Тэгэхээр төрт ёсоо дээдэлдэг Монгол хүн бол наадмыг дээдлэн хүндэлж явах ёстой” гэв.

Сайдын хэлж буй хэдхэн өгүүлбэр нь номын хэсгээс цээжилсэн аятай, албаны хуурай, хол хөндий авцалдаагүй сонсогдох нь юу вэ. Хүний амнаас гарч буй үг, өгүүлбэр бүхэн тархиар нь дамжин гардаг учраас тухайн хүнийг хэн бэ. Боловсрол мэдлэг, оюун ухааны чадамж ямар вэ гэдгийг бэлээхнээ хэлээд өгнө. Харин Соёлын сайдын маань хуурай хэдэн өгүүлбэрээс тэрбээр соёлын өвийг ч сайтар ойлгоогүй, иргэд Үндэсний их баяр наадмыг тэмдэглэхийг яагаад эсэргүүцээд байгааг ч ухаараагүй яваа бололтой.

Сайд аа, монголчууд Үндэснийхээ их баяр наадмыг төрт ёсондоо хүндэтгэлгүй хандсандаа эсэргүүцээгүй. Өдөрт хэдэн зуугаараа өвчилж, хэдэн арваараа хорвоог харамсалтайгаар орхиж байгаа хүнд энэ цагт цар тахлыг даамжруулахгүй гэсэндээ үндэснийхээ уламжлалт баяр наадмаас татгалзаж байгаа юм шүү дээ. Тэгээд ч монгол бахархал, монгол наадам мохож, мөхөхөөр тийм хямдхан биш гэдгийг Соёлын сайд та тогтоогоод аваарай.

У.Тэргэл