Засгийн газраас Үндэсний их баяр наадмыг үзэгчгүй, цахимаар зохион байгуулах шийдвэрийг гаргасан билээ. Үүнтэй холбоотойгоор Үндэсний их баяр наадмыг зохион байгуулах комиссоос мэдээлэл хийлээ. Мэдээллийн эхэнд Үндэсний их баяр наадам болон Ардын хувьсгалын 100 жилийн ойн арга хэмжээ тусдаа гэдгийг онцолсон юм.

Энэ талаар Үндэсний их баяр наадмыг зохион байгуулах Үндэсний комиссын Ажлын хэсгийн дарга Баатархүү “Үндэсний их баяр наадмыг тогтоосон хугацаанд зохион байгуулдаг. Хугацааг нь хуульчилсан. Хүй долоо худагт үзэгчгүйгээр зохион байгуулах бэлтгэл ажилдаа орсон. Харин Ардын хувьсгалын 100 жилийн ой бол бүтэн жилийн хөтөлбөр юм. Энэ нь Үндэсний их баяр наадмаас тусдаа арга хэмжээ юм. Үндэсний их баяр наадмыг зохион байгуулах хороонд нийтдээ есөн салбар хороо ажиллаж байгаа. Наадмын төсөв өмнөх жилд 2.8-3 тэрбум төгрөг зарцуулдаг. Энэ жилийн хувьд энэхүү төсвөөс хэтрүүлэхгүй байхаар зохион байгуулалтыг хийнэ. Хүй долоо худагт цахим наадмыг зохион байгуулж, ард түмэнд шууд дамжуулан хүргэнэ” гэв.

Соёлын дэд сайд М.Батбаяр: Ардын хувьсгалын ойг тэмдэглэн өнгөрүүлэх төлөвлөгөөг 2020 оны наймдугаар сард баталсан. Энэ хүрээнд 45 арга хэмжээ зохион байгуулахаар төлөвлөсөн. Энэ бүхний нийт зардал нь 10 тэрбум төгрөгөөр байхаар баталсан. Хамгийн гол нь энэ нь Үндэсний их баяр наадамд хамаарахгүй гэдгийг зөв олгоорой. Нийгэмд шүүмжлэлд өртөөд байгаа 10 тэрбум төгрөгийн зардал бол Ардын хувьсгалын 100 жилийн ойг бүтэн жилийн хугацаанд тэмдэглэх, зохион байгуулах 45 арга хэмжээний төлөвлөгөөний зардал юм. Саяхан Ардын хувьсгалын 100 жилийн ойг тэмдэглэхэд зарцуулах хөрөнгөөс хэмнэлт хийж, эрүүл мэндийн салбар болон “Ковид-19”-той тэмцэхэд зарцуулах шийдвэрийг Засгийн газраас гаргасан. Одоо УИХ-аар төсвийн зарцуулалтыг шилжүүлэх асуудлыг хэлэлцэж шийдвэрлэнэ. Мөн Үндэсний их баяр наадмаар сур, бөх, морины уралдааныг цахимаар ард түмэнд хүргэх Засгийн газрын шийдвэр хэвээрээ байгаа. Цахим наадам зохион байгуулах багийг томилсон. Ерөнхий найруулагчаар Н.Наранбаатар, продюсерээр Г.Цоггэрэл, туслах найруулагчаар Б.Баатар нар найруулахаар бэлтгэлдээ орсон” гэлээ.