Монгол Улсын Ерөнхийлөгч У.Хүрэлсүхийг тангараг өргөхдөө билэгдлийн ямар дээл, хувцас, малгай сонгох бол гэсэн сонжоо иргэдийн дунд байсан. Харин түүний хувцаслалт наанаа энгийн даруухан хэрнээ цаанаа ихээхэн утга учрыг агуулжээ.

Тодруулбал, Ерөнхийлөгч У.Хүрэлсүх есөн хөлт цагаан тугийн бэлгэдлийг шингээсэн, Монголын ахуй соёлыг харуулсан эмжээр бүхий үндэсний "Говь" брэндийн ноолууран малгайгаар гоёж, нүүдэллэж амьдрахад гайхалтай зохицсон гэр тэргийг малгайдаа дүрсэлж өгсөн нь олны харааг булааж байв.

Мэдээж эр хүний хийморь бүс. Ерөнхийлөгч У.Хүрэлсүхийн хувьд бүсний ар дээр таван өнгийн торгон утсаар өнгө дагнасан гурван давхар зүү ороосон, алтан соёмбыг есөн бадамлянхуа дээр залж, ашид мандан бадрахыг билэгдсэн байна.

Бүс нь зургаан өлзийн тоногтой, хамгийн зөөлөн тансаг эд болох торгон утас, хамгийн догшин хатуу эд болох ганг хоршуулан хийсэн нь арга бэлгэдлийн хослолыг урнаар илэрхийлжээ.

Мөн шинэхэн Ерөнхийлөгч маань тангараг өргөхдөө ээтэн монгол гутал өмссөн нь газрын шороог сэндийчихгүй, ургамал, амьтны аминд хүрэхгүй гэсэн энэрэнгүй утга санааг илэрхийлжээ.

У.Тэргэл