Монгол Улсын Ерөнхийлөгч У.Хүрэлсүх өнөөдөр тангарагаа өргөж, Ерөнхийлөгч Х.Баттулга төрийн тамгыг гардуулан өгсөн. Үүнтэй зэрэгцэн Ерөнхийлөгчийн Тамгын газрын даргаар Шадар сайд асан Я.Содбаатар ажиллахаар болж, Ө.Шижирээс тамгаа гардан авлаа.

Ажлаа хүлээлгэн өгсөн Ө.Шижир цахим хуудснаа "Нас залуу хэмээн ажралгүйгээр надад итгэл хүлээлгэж, Төрийн тамга түшилцэх эрхэм бөгөөд хүндтэй үүрэг оноосон Монгол Улсын тавдахь Ерөнхийлөгч Халтмаагийн Баттулга Танд талархал илэрхийлье.

Тангаргаа өргөн, бүрэн эрхээ хэрэгжүүлэх Монгол Улсын зургаадахь Ерөнхийлөгч Ухнаагийн Хүрэлсүх Танд амжилт хүсье!

Мөнх тэнгэрийн хүчин дор мянганаар өртөөлсөн Монгол төр үүрд мандах болтугай. Монгол орон бадартугай. 

Жич: Төрсөн өдрөөр маань түүхэнд 1920 онд Монгол Ардын Нам байгуулагдаж, Монголд шинэ Ерөнхийлөгч тангараг өргөж, МАН залуу шинэ даргатай болсон, би нь ажлаа хүлээлгэн өгсөн үйл явдлууд нэмэгдэв ээ. Баярлалаа, баяртай" хэмээжээ. 

Б.Баатар