Экс Ерөнхийлөгч Х.Баттулга Элчин сайд нарыг томилгоог “хав дарсан”. Тэрбээр бүрэн эрх нь дуусгавар болсон Элчин сайд нарыг эгүүлэн татах, мөн шинээр томилох асуудлыг тодорхойгүй шалтгаанаар гацаасаар ирсэн билээ. Ганц хөндсөн нь АНУ-д суух Онц бөгөөд Бүрэн эрхт Элчин сайд Ё.Отгонбаярыг эгүүлэн татах асуудлыг тавьж, УИХ-аар хэлэлцүүлсэн ч гишүүдийн дэмжлэгийг аваагүй юм.

Харин одоо шинэ Ерөнхийлөгч гадаадын улс орнуудын дунд үл ойлголцлыг үүсгээд байсан Элчин сайд нарын томилгоог шуурхайлахаар болж, хүмүүсийнх нь ч нэр эхнээсээ тодорчээ.

Үндсэн хуулийн 33.5-д “Монгол Улсаас гадаад улсад суух бүрэн эрхт төлөөлөгчийн газрын тэргүүнийг УИХ-тай зөвшилцөн томилох буюу эгүүлэн татах эрхийг Ерөнхийлөгч нь хэрэгжүүлнэ” хэмээн заасан байдаг. Энэ дагуу томилгоо үргэлжлэх нь.

Тухайлбал, Шадар сайд асан Ө.Энхтүвшинг Франц улс руу, ЗГХЭГ-ын дарга Ц.Нямдоржийн хүү, өдгөө Гадаад харилцааны яамны Төрийн нарийн бичгийн даргаар ажиллаж байгаа Н.Анхбаярыг Австрали улс руу, УИХ-ын гишүүн асан Д.Тэрбишдагвагыг ХБНГУ-д суух Элчин сайдад томилохоор санал нэгдсэн хэмээн эх сурвалж хэллээ. Цаашлаад УИХ-ын гишүүн асан Д.Оюунхорол, Боловсролын сайд асан Л.Цогзолмаа, Гадаад харилцааны сайд асан Д.Цогтбаатар нарын нэрс ч мөн дуулдаж байна.

У.Тэргэл