УИХ дахь Ардчилсан намын бүлэг мэдээлэл хийлээ.

УИХ дахь АН-ын бүлгийн дарга Д.Ганбат “АН-ын бүлэг коронавирусний хууль болон Боловсролын тухай хууль болон хамт өргөн мэдүүлсэн хуулийн талаар хэлэлцлээ. Монгол Улсад сүүлийн 24 цагийн байдлаар 1811 халдварын тохиолдол нэмэгдэж, нас барсан хүний тоо 533 боллоо. Засгийн газрыг бид хариуцлагагүй ажиллаж байна гэж дүгнэж байна.

Нэг бол Гамшгийн тухай хууль эсвэл Онцгой байдлын дэглэм зарла.

Хоёр Засгийн газар дамжиж 15.1 их наяд төгрөг зарцуулсан боловч ямар ч үр дүнд хүрсэнгүй. Жирэмсэн эх, хоёр сартай хүүхэд хүртэл нас барлаа. Хэнийг амьд үлдээх үү гэдэг байдал руу хүрч болзошгүй байна. Экспорт, импорт бүрэн зогссон байна. Тухайлбал, Гашуунсухайтын уурхай тэг зогсолт хийгээд 10 гаруй хонолоо.

АН удаа дараа сануулж хэлсээр байтал УИХ-ын чуулган дээр Ардын хувьсгалын 100 жилийн ой, медалийн өргөн, зузаан зэрэг зүйл ярьж байна.

Коронавирусний мутацилагдсан вирус болох дельта вирус Монгол Улсад ороод ирсэн эсвэл хаалгыг нь тогшоод байгаа юм уу гэдэг зүйл тодорхойгүй байна. Энэ талаар иргэдэд тайлангаа тавь гэж бид шаардаж байна. Өнөөдрөөс эхлэн АН-ын гишүүд чуулганы хуралдаанд бүрэн бүрэлдэхүүнээрээ оролцоно. Ковид-ын хуулиар үг хэлэх эрхийг хязгаарлаж байгаа ч иргэдтэйгээ эв санаа нэг байна.

Өнөөдөр Сүхбаатарын талбай дээр зул асаагаад, нас барсан иргэдэд гашуудал илэрхийлж байхад хорьж, цагдаж байна. Угтаа бол цагдаа нар иргэдийг хамгаалахаас биш авлигачдыг хамгаалах ёсгүй” гэлээ.

А.Сүх