Цахим наадам цар тахлыг дэвэргэхээс намжаахгүй. Үүнийг найман настай балчираас эхлээд наян настай буурал ч ойлгох хэмжээнд хүрээд байна. Гэтэл эрх баригчид цахим наадам хийнэ хэмээн уйларан зүтгэж, "улангасан дайрах" болов. Энэ нь ч өчигдөр Үндэсний урлагийн их театрын захирал Г.Цоггэрэлийн хийсэн мэдээллээс олон нийтэд ил болж, шүүмжлэл дагуулаад байна. 

Тодотговол, Үндэсний урлагийн их театрын захирал Г.Цоггэрэл цахим наадмыг юу ч болж байсан тэмдэглэнэ гэдгийг “ТИТАНИК” уран сайхны киногоор зүйрлэж, олны алмайруулсан. Тэрбээр цахим наадам хийх шалтгааныг тайлбарлах үеэрээ “Титаник” кинон дээр хөлөг онгоц сүйрч, усанд живж байхад дөрвөн хүн хийл тоглосоор л байдаг. Бид яг л адилхан ийм үүрэгтэй. Бид ард түмэндээ гоё сайхан зүйл харуулах гэж зорьж байна. Энэ бол бидний үүрэг. Ард түмэн бидэнд итгэх хэрэгтэй” хэмээн хариуцлагагүй мэдэгдэл хийсэн. 

Түүний хэлж буйгаар Монгол Улс коронавирусний халдварын улмаас сүйрлийн ирмэгт ирсэн бололтой. Тийм байсан ч цахим наадмыг тэмдэглэх ёстой аж. 

Ард түмэн туйлдаж, элдэв хөдөлгөөн өрнүүлж, үг хэлж, үзэл бодлоо илэрхийлсээр атал эрх баригчид үүнийг эс тоосон хэвээр. Коронавирусний цар тахлын улмаас 111 мянган хүн өвчилж, 552 хүн амь насаа алдаад байна. Гэтэл төр засаг эмгэнэл илэрхийлэх нь бүү хэл баяр наадам тэмдэглэхээр улайрч байгаа нь хэр зохимжтой бол. Уг нь бодох л асуудал. 

Төрийн тэргүүнд заларсан эрхмүүд ийнхүү баяр наадам тэмдэглэхээр зүтгэж байхад зарим аймаг баяр наадам тэмдэглэхгүй, наадам хийхээр төсөвлөсөн зардлаа эрүүл мэндийн салбарт нэн шаардлагатай тоног төхөөрөмж авахад зарцуулахаар шийдвэрлэжээ. Бахархаж, баярлам үйл явдал.

Тодруулбал, Өвөрхангай аймгийн Онцгой комисс хуралдаж, аймаг, сумын хэмжээнд улсын баяр наадмыг тэмдэглэхгүй байх шийдвэрийг гаргав. Баяр наадамтай холбоотой аймгаас төсөвлөсөн зардлаа эрүүл мэндийн салбарын ажилчдыг урамшуулах, урам зоргийг нь нэмэгдүүлэх, эрүүл мэндийн салбарт нэн шаардлагатай тоног төхөөрөмж авахад зарцуулахаар шийдвэрлэснээ Өвөрхангай аймгийн Засаг дарга бөгөөд Онцгой комиссын дарга А.Ишдорж ард иргэддээ мэдэгдлээ. Тэрбээр "Эрүүл байвал ирэх жилийн наадмыг үзнэ, энэ жилдээ бид ковидгүй хичээл сургуулиа цаг хугацаанд нь эхлүүлээд, бүтээлч ажлаар аймаг байгуулагдсан түүхт 90 жилийн ойгоо өнгөрүүлчихвэл ирэх жил бүх нийтээрээ эрүүл саруул 91 жилийн ойн баяр наадмаа уламжлалт ёсоороо өргөн дэлгэр тэмдэглэх боломжтой" гэдгийг хэлсэн юм.

Угтаа бол улс ч гэсэн цахим наадмаа тэмдэглэхээ больж, зарцуулах хөрөнгөө эрүүл мэндийн салбарт зориулвал талархаж, баярлах хүн олон байхсан. Монголчууд түрүү жил цахим наадам ямар байдгийг яруу тодоор харсан, үзсэн, мэдсэн. Одоо хангалттай.   

Б.Баатар