УИХ-ын нэгдсэн чуулганы өнөөдрийн /2021.06.29/-ийн хуралдаан яг одоо Боловсролын ерөнхий хуулийн төсөл болон бусад хууль, тогтоолын төслийн хэлэлцүүлгээр үргэлжилж байна. Энэ үеэр УИХ-ын гишүүн Н.Ганибал бүх хүүхдэд албадан бүрэн дунд боловсрол олгохоос илүүтэй суурь боловсролд бүрэн хамруулаад, МСҮТ-д сургаж, мэргэшсэн ажиллах хүчин бэлтгэхэд анхаарах нь зүйтэй гэсэн санал дэвшүүллээ.

Тэрбээр хэлэхдээ, “Боловсролын хууль бол маш чухал хууль. Нэлээд судаллаа. Боловсролын ерөнхий хуулийн төслийг харахад, үр дүнд суурилсан аргыг түлхүү ашиглаад, дэд салбар бүрд тулгарч буй саад бэрхшээлийг бүлэглэн томьёолсон байна. Үүний үндсэн дээр болон олон улсын түвшний чиг хандлагад суурилаад, салбарын мэргэжлийн хүмүүс маань зорилго, зорилт болон үр дүнгээ хэмжиж болохуйцаар сайн тодорхойлсон гэж найдаж байна. Гэхдээ анхаарал хандуулах асуудлууд бас байна. Гурван асуулт тавья.

Нэгдүгээрт, заавал эзэмших боловсрол буюу суурь боловсролын 9 жилийг 12 жил болгохоор тусгасан байна. Боловсролын талаарх тогтвортой хөгжлийн зорилтын хүрээнд Сургуулийн өмнөх боловсролыг нэг жил заавал эзэмшихээр онцолсон болохоос бүрэн дунд боловсролыг заавал эзэмших ёстой гэж заагаагүй. Манай улсын хувьд 2019 оны байдлаар бүрэн дунд боловсролд хамрагдаж буй цэвэр жин 86.5 хувь, төгсөлт нь 70.5 хувь байгаа. Шинэ хуулиар 100 хувь болгох зорилт тавьсан байна. Үүнийг хэрэгжүүлэхэд шаардлагатай санхүүжилт, боловсон хүчин, дэд бүтэц, багшийн нийлүүлэлт гээд олон асуудал бий. Суурь боловсролоо эзэмшээд мал аж ахуй дээр гарч байгаа, мөн МСҮТ-д суралцаж буй хүүхдүүдийн асуудлыг хэрхэн авч үзэх вэ.

Хоёрдугаарт, сургалтын чанарт суурилж, багш нарын цалин урамшууллыг олгох тухай заасан байна. Багш нарын цалинг сурлагын амжилтаар нь дүгнэснээр боловсролын чанар, тэгш байдал, тэгш боломжийг хангахад тулгарч буй асуудал илүү гаарна. Үүнийг эргэн харж, маш сайн судлаарай. ЮНЕСКО-оос гаргасан судалгаанаас харахад, боловсролын нийт зардалд эзлэх багшийн цалин 42.6 хувь байснаа буурсаар байгаад 2019 онд 30.4 хувь болчихсон байна. Үүнийг бас бодох хэрэгтэй.

Гуравдугаарт, санхүүжилтийн асуудал байна. Сүүлийн таван жилд ДНБ-ий 4.4, улсын төсвийн 14.4 хувийг боловсролд зарцуулсан байдаг. Гэвч энэ үзүүлэлт буурч байгааг анхааралдаа аваарай гэлээ.