Коронавирусний халдвар хэдийнэ цар тахлын хэмжээнд хүрч, эрдэнэт хүний алтан амь эрсэдсээр, халдварын тоо тасралтгүй өссөөр байна. Гэсэн ч Үндэсний их баяр наадмыг цахимаар тэмдэглэх шийдвэр хэвээр. Бэлтгэл ажил хангагдсаар байгаа нь олны дургүйцлийг төрүүлж, эсэргүүцэлтэй тулгараад буй. 

Засгийн газраас аймаг, сумдын баяр наадмыг тэмдэглэх эрхийг тухайн орон нутгийн удирдлагуудад олгосон нь оновчтой шийдвэр байв. Учир нь аймгийн Засаг дарга нар эхнээсээ баяр наадам тэмдэглэхгүй, төсөвлөсөн хөрөнгөө эрүүл мэндийн салбарт зарцуулна хэмээн мэдэгдэж, давалгаалаад эхлэв. Эрдэнэт хүний алтан амь, үндсэн хуулиар олгогдсон амьд явах, эрүүл аюулгүй орчинд амьдрах эрхийг дээдэлж буй тэдэнд иргэд халуун баяр хүргэж, талархал илэрхийлж байна. Өнөөдрийн байдлаар зургаан аймаг баяр наадам тэмдэглэхгүй байх шийдвэр гаргасан талаараа мэдээлээд байгаа юм. Тодруулбал, Өвөрхангай, Дархан-Уул, Баянхонгор, Дорнод, Завхан, Сэлэнгэ зэрэг аймгууд баяр наадам тэмдэглэхгүй байхаар шийдвэрлээд байна.

Өвөрхангай аймгийн Онцгой комисс хуралдаж, аймаг, сумын хэмжээнд баяр наадмыг тэмдэглэхгүй байхаар шийдвэрлэсэн талаар аймгийн Онцгой комиссын дарга бөгөөд Засаг дарга А.Ишдорж олон нийтэд мэдээлсэн. Энэ нь ч үнэхээр зөв, олонд үлгэрлэсэн шийдвэр байж чадсан юм. Тодруулбал, энэ онд тус аймгийн үүсэн байгуулагдсаны түүхт 90 жилийн ой тохиож байгаа. Гэвч халдварын нөхцөл байдал амаргүй байгаа учир баяр  наадамтай холбоотой аймгаас төсөвлөсөн зардлаа ээрүүл мэндийн салбарын ажилчдыг урамшуулах, урам зоригийг нь нэмэгдүүлэх, эрүүл мэндийн салбарт  нэн шаардлагатай тоног төхөөрөж дутагдалтай байгаа эм, эмнэлгийн хэрэгслийг авахад зарцуулахаар шийдвэрлэсэн байна. Мөн тэгш ойгоо аймаг даяараа бүтээлч ажлуудыг өрнүүлж, бүтээн байгуулалтыг эрчимжүүлж, аймаг, сумынхаа өнгө үзэмжийг сайжруулж, ая тухтай амьдрах орчин нөхцөлийг нэмэгдүүлэхийн төлөө иргэдтэйгээ хамтран ажиллах болно гэдгээ мэдэгдэв.

Дархан-Уул аймгийн онцгой комиссын хуралдаанаар долоодугаар сарын 01-нээс 2021 оны есдүгээр сарын 1-ний өдөр хүртэл баяр наадам, ойн арга хэмжээ зохион байгуулахыг хориглолоо. 

Баянхонгор Аймгийн ИТХ-ын хуралдаанаар цаг үеийн нөхцөл байдлаас шалтгаалан 2021 онд "Ардын хувьсгалын 100 жил"-ийн ойн Аймаг, сумдын баяр наадмыг зохион байгуулахгүй хэмээн шийдвэрлэжээ.

Дорнод аймаг болон нийт сумдад баяр наадам зохион байгуулахгүй байхаар шийдвэрлэжээ. Иймд наадам тэмдэглэхэд төсөвлөсөн хөрөнгө зардал нь цар тахлаас урьдчилан сэргийлэх, түүнтэй тэмцэхэд 100 хувь зарцуулагдахаар болжээ.

Завхан аймгийн хэмжээнд Улсын баяр наадмыг тэмдэглэхгүй байхаар шийдвэрлэв. Наадамд төсөвлөсөн зардлаараа эмнэлэг, цагдаагийн тоног төхөөрөмжөө сайжруулж, машиныг нь шинэчилжээ. Улмаар өчигдөр эмнэлэг, цагдаагийнханд шинэ машин гардуулан өгсөн байна.

Сэлэнгэ аймаг есдүгээр сарын 1 хүртэл ямар нэг ой баяр наадам тэмдэглэхгүй байхаар болжээ. Өнөөдөр АОК-ийн хурлаар эцэслэн баталж, бусад шийдвэрүүдийг мөн гаргана гэдгээ мэдэгдэв. 

Ийнхүү наадмаас татгалзсан аймаг, сумдын тоо өдрөөр нэмэгдэж байна. Харин улсын баяр наадам хойшлох, цуцлах эсэх нь өнөөдрийг хүртэл тодорхойгүй байгаа юм. Халдварын нөхцөл байдал хүнд, эрүүл мэндийн салбар туйлдаад байгаа энэ үед баяр наадмыг цахимаар ч тэмдэглэхгүй байж, халдвар хамгааллын дэглэмээ баримтлах нь зүйтэй гэдэг саналыг иргэд уламжилж, "No Naadam" хөдөлгөөнийг хүртэл өрнүүлээд буйг энд дахин онцолъё. 

Б.Баатар